Powadi 6 - Wunta Mempori

Mperupa-rupa patudu 6:1-19

¹ Hei anaku, tewala omue gagi pe'inia a mpe'asa miamu, ka moweweu tepo'asaa mpau saru mia hawe;

² ka omue kona oho a laro pinauno ngangamu, kona rako a laro pinauno ngangamu,

³ weweuomo kanandio, hei anaku, ka potolaomo koroimu, hangano omue tedontakomo a laro kungkuno pe'asa miamu: lakomo, penggolontumo, ka dadaiomo pe'asa miamu atuu;

⁴ si po'ineeo matamu moturi, ka kuli matamu mongkokoturi;

⁵ potolaomo koroimu kana lagiwa inso mporakoa, kana manu-manu inso a ngkaeno anu mompaani.

⁶ Hei anu moluwe, lakomo a limonti, pekokoongakono peleluno ka gagimo pande mosongka:

⁷ maupo nahina petewawa, anu mo'atora ke anu pabawano,

⁸ onae patindao rotino i tempono motu'i-tu'i, ka mopumpu kaangano i tempono konsowia.

⁹ Hei anu moluwe, opiapo tehineno upepombole? Te'ipiapoke upewangu inso a mpoturimu?

¹⁰ ”Tede-tedei moturi, tede-tedei mongkokoturi, tede-tedei mekopu-kopu'aro ka ipepombole mpiha”,

¹¹ ka haweomo mongkokolaro ndi omue kana ponsapoi, ka makuraa kana mia anu meparewa mpetea.

¹² Nahi mentudu ka mosa'oomo mia anu tuwu saru nganga mpegaupi,

¹³ anu mempiroakono matano, anu metondoniako karu ka metiso-tisoako wunga ngkae,

¹⁴ anu aroano monaa pompopo'oo, anu wela mosongka mosa'oa, ka anu moweweu pengengea.

¹⁵ Onaemo pu'uno ka i'aluo masolaa mepobingko, nahi kinoo-koo onae sinolangi nahi pinokotulungi mbo'u.

¹⁶ Onoo rupa wineweu andio anu o'alia-Do i Ue, tendeano opitu rupa wineweu anu mokoburu-Do:

¹⁷ mata mompelangka-langkai, elo megaupi, kae anu mo'uwu reano mia anu nahina salano,

¹⁸ aroa anu weweuo luwuno sinongka anu mosa'o, karu anu ronga melulu te'aro a mosa'oa,

¹⁹ asa mia sakosii megaupi anu mepuuriako pegaupi ka mompokohina pengengeado mpepaekompo.

Patudu mongkona ponsosaboa 6:20–7:27

²⁰ Hei anaku, pekariaomo parentano amamu, ka si kolupeo pompaguruno inemu.

²¹ Welamo tanggoo luwuno atuu i aroamu, pe'enu-enuomo a we'umu.

²² Tempono upelempa, onae ta wawako, tempono upepombole, onae ta dumagaiko, tempono upewangu, onae ta kumuahakomu.

²³ Hangano parenta atuu hulu, ka pompaguru atuu wanta, ka pongkuahako anu mompaguru atuu sala ntuwua,

²⁴ anu kumaduduiko inso a beine mosa'o poweweuno, inso a pompopandeino beine lansara.

²⁵ Si mosisiriakono tekosino i laro aroamu, si tepopandeiako wulu matano.

²⁶ Hangano asa mia anu belesu asa mpole koa roti anu kinereno, sine beineno mia susua mompete'umala penaa anu masuli olino.

²⁷ Polioke mia mowawa api a wawo mpa'ano ka nahi mo'ai sangkano?

²⁸ Ke polioke mia melempa a wawo waro api, ka nahi mo'ai karuno?

²⁹ Kanatuu koa mbo'u mia anu mewowaliakono beineno pe'asa miano; nahina maupo te'asa mia anu umanggao tola inso a mpohuku.

³⁰ Asa mia monako nahi ta pinokongkodei tewala onae monako ta motendeo mingkino mongkaa hangano mokoninggo.

³¹ Sine, tewala kona rako, onae asalakono umowahio meluka opitu, luwuno ihino rahano asalakono ipeweengakono.

³² Isema monsosabo nahi molino pinewowolono; mia anu moweweu kanatuu sumolangio koroino.

³³ Tebobarasai ka pompasinggiri hinaweno, tetataano nahi te'onini.

³⁴ Hangano mosiri onaemo mokontekudao asa tama, onae nahi ponto'ori mompehohawa a oleo pombaloa;

³⁵ onae nahi ta behe montarima pontolosi maupo hapa, ka onae ta mekorahako mpiha, maupo te'opia hadiono pompoweemu.