Powadi 5 - Wunta Mempori

Patudu mongkona ponsosaboa 5:1-23

¹ Hei anaku, pekokoongakonomo ponto'oriku anu mentee, po'aroomo birimu a ponto'ori anu kupaguruakomu,

² ka upe'ini a mpande mosongka ka wiwimu mekariao ponto'ori.

³ Hangano wiwino beine sodilo mompo'iti itino siu hoani ka langirano ngangano moloreopo sekono lana,

⁴ sine lembuino onae mopa'i kana upeu, ka montaso kana ponai memata orua.

⁵ Karuno metii te'aro a matea, pelempano te'aro a ntolinodo mia mate.

⁶ Onae nahi pontonda sala ntuwua, pesalaano tesaa, komba ito'orio.

⁷ Onaemo pu'uno, hei anaku, ronge akumo, si pansia inso a mpinauno ngangaku.

⁸ Poko'olaio pesalaamu inso ndi onae, ka si umpedaakono pewowano rahano,

⁹ ka si upeweengakono pelangkaimu a mia susua, ka luwuno ta'u tinuwumu a mia lambaha;

¹⁰ ka si mia susua mowohiakono rosomu, ka hasilino pe'iseimu nahi pewinso a rahano mia hawe

¹¹ ka poko'ariano omue ko mompemasusa, tempono ihi ka koroimu mate,

¹² ka u'amba komotae, ”Ha, tembio ka ku'o'aliaakono pompaguru, ka aroaku mosa'oakono pongkuahako;

¹³ tembio nahi kuperorongeakono paudo guruku, ka nahi kupo'aroo biriku a luwuno anu paguru aku?

¹⁴ Ilawupo kutedonta a laro sompo masolaa i tonga-tongado bawaa ka tepumpua.”

¹⁵ Inuomo uwoi inso a nsumurumu omuemu, uwoi anu bubulaka inso a nsumurumu.

¹⁶ Tekonake mata uwoimu lulua i bungkuno kana waaano uwoi a luwuno tanalapa?

¹⁷ Po'ineeomo atuu gagi omuemu me'ueo, si gagi mia susua mbo'u me'ueo.

¹⁸ Po'ineeomo ka irinonso insoano uwoimu, po'undemo saru kombiamu tempono umongura:

¹⁹ rusa anu mo'ahi, lagiwa anu tekosi; po'ineeomo wua radano wela mokontendeko, ka omue wela tesingka hangano pongkekewoino.

²⁰ Hei anaku, tembio ka utesingka a beine sodilo, ka mongkopui radano beine lansara?

²¹ Hangano luwuno pesalaano mia te'ungkahi i arono pongkita-Do i Ue, ka luwuno pelempano mia Dodagaio.

²² Mia mosa'o gauno kona rako a laro wineweuno mosa'o, ka kona oho a laro ngkoloro halano onaeno.

²³ Onae mate hangano nahi tarimao pompaguru ka hangano benge-bengeno anu langkai ka itesaa.