Powadi 4 - Wunta Mempori

Patudu mo'ungke ponto'ori mentee 4:1-27

¹ Rongeomo, hei nana'ote, pompaguruno asa ama, ka pekokoongakonomo ka upohawe ponto'ori,

² hangano ongkue moweeakomu pompaguru anu moiko; si bintao pontisoku.

³ Tempono ongkue da gagi ana i rahado amaku, molema ka kana anado ineku anu asa-asa,

⁴ dopaguru aku amaku, dopotae ndi ongkue, ”Po'ineeomo aroamu uminio pauku; pe'inimo a luwuno pontisoku, ka omue kotuwu.

⁵ Alaomo ponto'ori anu mentee, alaomo pompewowolo molino, si kolupeo, ka si pansia inso a mpinauno ngangaku.

⁶ Si bintao ponto'ori anu mentee atuu, ka kopinekaria, onae pehohawao, ka ta dumagaiko.

⁷ Pompu'uano ponto'ori anu mentee onaemo alaomo ponto'ori anu mentee ka saru luwuno anu inalamu alaomo ponto'ori.

⁸ Onae su'uomo, ka omue ta tumandeko; omue ta mokogagiko pinelangkai tewala ukopuio.

⁹ Onae ta mompokonaakomu bunga peramba-ramba anu tekosi a ulumu, ramba-ramba ulu anu tekosi ta weeakomu.”

¹⁰ Hei anaku, rongeomo ka tarimaomo pauku, ka igagi hadio ta'u tumuwumu.

¹¹ Ongkue paguruakomu pesalaa tumo'orio anu mentee, ongkue wawako a mpesalaa anu moleo.

¹² Tewala omue melempa, pelempamu nahi ta te'onsoi, tewala omue melulu, nahi kotetidu.

¹³ Pe'inimo a pompaguru, si potolao, pekariaomo, hangano onaemo tuwumu.

¹⁴ Si pesalaio pesalaano mia mosa'o gauno, ka si tondao pesalaano mia moweweu mosa'o.

¹⁵ Olaiakonomo pesalaa atuu, si telaloio, pansiamo inso ndi onae ka potilalomo.

¹⁶ Hangano nahi dompokompoturi, tewala nahi dompoweweu anu mosa'o; tampula mongkokoturido, tewala nahi domeweweuo mia tetidu;

¹⁷ hangano ondae mpongkaa roti gau mosa'o, ka mpo'inu anggoro pobobarasaia.

¹⁸ Sine, pesalaano mia mentee atuu kana wantano towea, anu komewa-mewantano hawe kona ntu'u ntonga oleo.

¹⁹ Pesalaano mia mosa'o gauno atuu kana wongi-wongi; nahi domento'orio hapa pu'uno ka dontetidu.

²⁰ Hei anaku, pekokoongakonomo pauku, po'aroomo birimu a mpinauku;

²¹ luwuno atuu si olai inso ndi omue, naaomo atuu i laro aroamu.

²² Hangano onaemo atuu anu gagi tuwuado anu mehaweo ka mokotompao asa ngkoroido.

²³ Aroamu dagaiakonomo luwuno petangkoro, hangano insomo i ra'ai tepansari tuwua.

²⁴ Tadiomo nganga pompopo'oo inso ndi omue ka poko'olaiomo wiwi pegaupi inso ndi omue.

²⁵ Po'ineeomo matamu mengkita mpiha i arono ka pengkitano matamu kongko mpiha i arono.

²⁶ Pokomereteomo pesalaano karumu ka asalakono tekosi luwuno pesalaamu.

²⁷ Si pansia i koana ke i manggali, poko'olaiomo karumu inso a wineweu mosa'o.