Powadi 31 - Wunta Mempori

Powadi tiano i Lemueli inso ndi ineno 31:1-9

¹ Ndiomo pauno i Lemueli, mokole i Masa, anu ipaguruakono ineno.

² Hapa anu aku pauo, anaku, ana ngkoroiku, ana tinangaku?

³ Rosomu si weeakono beine, ka pesalaamu a luwuno beine anu mpepate ira mokole.

⁴ Nahi pototono mokole, hei Lemueli, nahi pototono mokole mo'inu anggoro, ke maupo a luwuno anu langkai potorono mosisiriakono inua mokora,

⁵ ka si mansa hangano inua ikolupeo hapa anu pinakosiomo, ka melengkuakono tiado mia anu ntepokonsii.

⁶ Inua mokora weeakonomo mia anu ta mate, ka anggoro a mia anu masusa aroa.

⁷ Po'ineeomo ipo'inu ka ikolupeo mongkokolarono, ka nahi pewowoloo mbo'u masusano.

⁸ Ungkahiomo ngangamu tiano mia anu beebe, tiado luwuno mia anu tepo'inee.

⁹ Ungkahiomo ngangamu, alaomo pomputusi anu moleo ka alaakonomo tiano mia anu tepokonsii ka anu mongkokolaro.

Po'unde-unde tiano beineno anu pande 31:10-31

¹⁰ Beineno anu pande isemake ta humaweo? Onae masuliopo olino sekonopo paramata.

¹¹ Aroano tamano me'ala-alao, tamano nahi ta makuraako me'uraa.

¹² Onae moweweu moiko a ntamano ka nahi poweweu anu mosa'o asa ntinuwuno.

¹³ Onae mo'ungke wulu bimba ka tembi, ka sanaa mo'anggaako kaeno.

¹⁴ Onae kana kapalado puu mpebalu-balu langkai, inso olaiano ipowawa kaangano.

¹⁵ Onae mewangu tempono da wongi-wongi, ka i'amba patindao kaangado pe'asa rahano, ka tumia-tiao anggaa a luwuno puu pompekakaakono beine.

¹⁶ Onae mo'oli lere anu ineheno, ka inso a hasilino kaeno onae moweweu lere anggoro.

¹⁷ Tongano ibooakono rosono, ipokorosoo tokiano.

¹⁸ Ito'orio nine usahano hinao untuno, i tempono wongi pelitano nahi mate.

¹⁹ Kaeno inaao a roda mpohoru, wunga ngkaeno mo'ini pongkalulu bana.

²⁰ Kaeno iweeakono anu tepokonsii, tumasiakono kaeno a mia anu mongkokolaro.

²¹ Onae nahi danggaraakono pe'asa rahano tempono metii seru baku, hangano luwuno ihino rahano mpesangka rua api.

²² Onae moweweu umpeo tekosi tiano koroino, lena alusu ka sawu wungo sangkano.

²³ Tamano tino'ori a mpewowa langkai tempono mentoro mperonga-ronga luwuno mia memota'uno wita atuu.

²⁴ Onae moweweu sangka inso a lena ka umasao, onae mompatinda peboo ntonga a mia mpebalu-balu.

²⁵ Roso ka pompelangkai gagi pesangkano, onae mengingisi mongkona oleo lembuino.

²⁶ Ngangano i'ungkahiakono ponto'ori anu mentee, pompaguru petenunu mompehohawa kongko a elono.

²⁷ Onae paresao luwuno orusua a nsomborino, kaanga moluwea nahi kaano.

²⁸ Luwuno anano mpewangu, ka mpotaeakono me'ura, tamano mbo'u umunde-undeo,

²⁹ ”Hadio beine pande mpo'angga, sine omue lumaloi ira luwu.”

³⁰ Tekosi atuu mompopo'oo ka tekosia nahina tuduno, sine beineno anu doitoako Ira i Ue inunde-unde.

³¹ Weeakonomo tia inso a hasilino kaeno, po'ineeomo wineweuno umunde-undeo a mpewowa langkai!