Powadi 30 - Wunta Mempori

Luwuno pauno i Aguri anano i Yake 30:1-33

¹ Pauno i Aguri anano i Yake inso i Masa. Pinauno mia atuu: Ongkue mekendo-kendoako, oo Ue Ala, ongkue mekendo-kendoako, hawe pingko rosoku.

² Hangano ongkue andio lalu benge-benge sekonopo mia susua, ponto'orino mia nahina ndi ongkue.

³ Ponto'ori anu mentee mbo'u nahi kupepaguruakono, ranta nahi kupokonto'ori Ira Anu Tedoa Mempori.

⁴ Isemake anu mewuatako i suruga ka i'amba metii? Isemake anu pumpuomo angi a laro kungkuno? Isemake anu montongoomo uwoi a nsawu? Isemake anu pakosiomo luwuno tompano tolino? Isema neeno ka isema neeno anano? Omiu manasa tumo'orio!

⁵ Luwuno pau-Do Ue Ala atuu mentee luwu. Onae kantano mia anu mepekadudui ndi Ondae.

⁶ Si tiangio pau-Do, ka si Dokuahakomu ka omue nahi pinotaeako anu megaupi.

⁷ Orua rupa ku'emao ndi Omiu, po'ineeomo ka Itarimao se'eluno napi kumate, onaemo:

⁸ Ipoko'olaio inso ndi ongkue molengkua ka pegaupi. Si poweeakune mongkokolaro ke kaeaa. Ipo'ineeomo ka kukaano kaanga anu gagi tiaku.

⁹ Ka si kuhapu Komiu, tewala mowohi aku, ka mepau: Isemake Ondae i Ue atuu? ke tewala mongkokolaro aku, aku monako, ka sumosa'aio nee-Do Ue Alaku.

¹⁰ Si pomposebe asa mia ata a ueno, ka si totonaako ka omue asalakono tumembio sala atuu.

¹¹ Hinao inule anu montotonaa amano ka nahi ronsoo ineno.

¹² Hinao inule anu potaeno koroino morina, sine napi wino'ohi inso a regeno onaeno.

¹³ Hinao inule anu mompau pohaweno mompelangka-langkai, anu tetande kuli matano.

¹⁴ Hinao inule anu ngisino ponai, anu tinduno piso, ka ipingko ikaano mia tepokonsii inso i tolino, ka mia mongkokolaro inso i olono mia.

¹⁵ I linta hinao orua anano beine. ”Weeakono, weeakono!” dompotae. Hinao otolu rupa anu nahi ta mowohi, hinao opaa rupa anu nahi ta hori motae, ”Sompo!”

¹⁶ Tolinodo mia mate, ka pe'anakaa anu biita, tolino anu nahi hori tendeako uwoi, ka api anu nahi hori motae, ”Sompo!”

¹⁷ Mata anu mompasinggiri ama ka mo'ondaha rumongeo ine ta tumungkuo paa-paa lembono ka ikaano anano rajawali.

¹⁸ Hinao otolu rupa anu mokongkohali-hali aku, tendeano, hinao opaa rupa anu nahi kupokonto'orio:

¹⁹ pesalaano rajawali i laro meene, pesalaano ule a wawo wita motea, pesalaano kapala a ntonga ntahi, ka pesalaano asa tama saru asa beine.

²⁰ Ndiomo pesalaano beine anu monsosabo: onae mongkaa, ka i'amba pahihio ngangano, ka motae: Nahi kupoweweu mosa'o.

²¹ Hangano otolu rupa tolino mondidi-ndidi, tendeano, hangano opaa rupa nahi pokompeteao:

²² asa mia ata, tewala onae gagi mokole, asa mia monge-monge, tewala onae mongkaa mowohi lahi,

²³ asa beine anu o'aliado mia, tewala onae mohawe tamano, ka asa ata beine, tewala onae umalao pentoroano beine pe'ueano.

²⁴ Hinao opaa kondehora kodei i tolino, sine tedoa magasi peleluno:

²⁵ limonti, tongku anu nahi moroso, sine mompatinda kaangano i tempo motu'i-tu'i,

²⁶ palandu, tongku anu molema, sine moweweu rahano a pongku watu,

²⁷ kosume anu nahina mokoleno, sine luwuno melako mpebaresi,

²⁸ tita anu upokorakoakono kae, sine hinao koa mbo'u a luwuno langkanaeno mokole.

²⁹ Hinao otolu kondehora anu moroso pelempano, tendeano, opaa rupa anu moroso pelempano:

³⁰ singa, anu lalu moroso i olono kondehora, anu nahi ponsuka maupo hapa;

³¹ manu lakino anu mompelangka-langkai, bembe lakino, ka asa mokole saru sorodaduno.

³² Tewala umue melelu benge-benge saru mompelangka-langkai, tewala omue mosongka mongkona atuu petompoakonomo kaemu a ngangamu!

³³ Hangano, tewala susu dinanso, mantega hasilino, ka tewala enge dinanso, rea meluarako, ka tewala tekuda pino'inee, pe'u'uaa anu gagi.