Powadi 3 - Wunta Mempori

Ronso inso a ponto'ori mentee 3:1-26

¹ Hei anaku, si kolupeo pompaguruku, ka po'ineeomo aroamu mekariao parentaku,

² hangano melai tinuwu ka luwuno ta'u tumuwumu saru manangaia ta tiniangiako ndi omue.

³ Pompehohawa ka petenunu si tebinta inso ndi omue! Pe'enu-enuakomo atuu a we'umu, buriomo i laro aroamu,

⁴ ka komohawe pompehohawa ka pompelangkai a pongkita-Do Ue Ala saru mia.

⁵ Pe'ala-ala Iramo i Ue tompaano aroamu, ka si pehonda a ponto'orimu omuemu.

⁶ Pe'ala-ala Iramo a laro ntumuwumu, ka Ira mokomoleoo pesalaamu.

⁷ Si potae koroimu pande mosongka, doitoako Iramo i Ue ka olaiakono mosa'oa;

⁸ onaemo anu ta mokomoikoo koroimu ka mokorosoo luwuno wukumu.

⁹ Pelangkaiako Iramo i Ue arataamu ka wua amba-ambano inso a hasilino witamu,

¹⁰ ka luwuno si'emu ta te'ihii buke ranta hadio ntu'u, ka bolusa pomporo'iamu ta luluaako uwoino wua anggorono.

¹¹ Hei anaku, si pebungkuio pompaguru-Do i Ue, ka si te'osaakono pompopoto'ori-Do.

¹² Hangano Ondae i Ue tumunduhio mia anu pinehohawa-Do, kana asa ama a ana anu pinehohawano.

¹³ Me'uraomo mia anu mohawe ponto'ori anu mentee, mia anu mohawe pande,

¹⁴ hangano me'urano lumaloio salaka, ka hasilino lumaloio wulaa.

¹⁵ Onae masuliopo olino sekonopo paramata; maupo hapa anu inehemu nahi pokopengkenaakono.

¹⁶ Tuwu melai kongko a ngkae koanamu, a ngkae manggalimu kaeaa ka pompelangkai.

¹⁷ Pesalaano onaemo pesalaa anu buke me'uraa, luwuno pesalaano manangai luwu.

¹⁸ Onae gagi keu tuwuano mia anu metako ndi onae, isema anu me'ini ndi onae ta pinau me'ura.

¹⁹ Saru ponto'ori-Do i Ue Donaaomo empehino tolino, saru pinewowolo molino Dopakosio langi,

²⁰ saru ponto'ori-Do uwoino tahi malua asa wawontolino tesiarawo ka seru mompo'iti tontoru.

²¹ Hei anaku, pontimbanga ka pande mosongka si olai inso a matamu, pekariaomo atuu,

²² ka atuu ta gagi tuwuano sumangamu, ka ramba-rambano we'umu.

²³ Ka omue komelempa a mpesalaamu nahina mompokodoito, ka karumu nahi ta tetidu.

²⁴ Tewala mepomboleko, nahi kodoito, sine omue komepombole ka moturi rodo.

²⁵ Siimo doitoakono masolaa anu mepobingko, ke mateano mia mosa'o gauno, tewala atuu hawe.

²⁶ Hangano Ondaemo i Ue anu ta gagi pehondaamu, ka Ira lumiahakono karumu inso a oho.

Po'oluako moweweu moiko 3:27-35

²⁷ Si ontoo moikoado mia anu tekona domentarimao, kahinaano upolio weweuo.

²⁸ Si potae a mpe'asa miamu, ”Lakomo ka pekulemo, tisomopo kuweeakomu,” sekono anu inemano hinao ndi omue.

²⁹ Si posongka anu mosa'o a mpe'asa miamu, sekono onae nahina pinorerengkono ipo'ia saru omue.

³⁰ Si pe'u'uaakono asa mia nahina pu'uno, kahinaano onae nahi poweweu mosa'o ndi omue.

³¹ Si mosisiriakono mia anu lambaha, ka si pobiniki maupo te'asa inso a mpesalaano,

³² hangano mia anu tesaa onaemo anu mokoburu-Do i Ue, sine Ondae mewali-waliakono mia anu moleo.

³³ Pontotonaa-Do i Ue kongko a rahano mia mosa'o gauno, sine po'iangano mia mentee Doronsoo.

³⁴ Tewala Ondae mo'aropi anu mompasinggiri, Ondae mbo'u mompasinggiri, sine mia anu me'urumako Dopehohawao.

³⁵ Mia pande mosongka ta mohawe pompelangkai, sine mia anu benge-benge ta montarima pasinggiri.