Powadi 29 - Wunta Mempori

¹ Isema me'ulu watu, maupo mohaweomo pongkuahako, ta mepobingko sinolangi ka nahi pinokompomule mbo'u.

² Tewala mia mentee tetiangi hadio, mpo'unde iramo palili, sine tewala mia mosa'o gauno moparenta, pompau iramo pinemasusado palili.

³ Mia anu mongkekewoi ponto'ori anu mentee mokomawongkoo amano, sine isema anu mebawaa saru beine belesu mopingko arataa.

⁴ Saru moleoa mokole kumorahakono wita, sine mia anu motuntu hadio sima'ulu kumale-kaleo.

⁵ Mia anu wela mo'ungke ura a mpe'asa miano mompadindi oho i arono karuno.

⁶ Mia anu moweweu mosa'o te'ohoako polimpa'ino, sine mia mentee ta kumora ka mo'unde.

⁷ Mia mentee tumo'orio tiano mia molema, sine mia mosa'o gauno nahi pokonto'orio.

⁸ Anu mompasinggiri mokomarisuo kota, sine mia pande mosongka mokomorinio tekuda.

⁹ Tewala mia pande mosongka mekara-kara saru mia benge-benge, mia benge-benge andio momemu ka mengingisi, onaemo ka nahina rodoa.

¹⁰ Mia anu mokorangaako rea umo'aliaakono mia moleo, sine mia anu moleo aroano merioo penaano.

¹¹ Mia monge-monge motiio luwuno tekudano, sine poko'ariano mia pande mosongka mokomorinio.

¹² Tewala anu moparenta metondaio pegaupi, luwuno pegawaino gagi mosa'o gaudo.

¹³ Mia mongkokolaro ka anu mompokonsii hinao pengkenaado: Ondae i Ue moweeako ira wanta a matado orua ira.

¹⁴ Mokole anu mobitara mia molema a moleoa, kadera poparentaano moroso mpiha ranta nahina tampulaano.

¹⁵ Tuko ka pongkuahako mowawa ponto'ori anu mentee, sine ana anu pino'inee ta mokoko'iio ineno.

¹⁶ Tewala mia mosa'o gauno tetiangi, tetiangiomo mbo'u polimpa'ia, sine mia mentee ta kumitao tedontaado.

¹⁷ Paguruomo anamu, asalakono onae ta moweeakomu rodoa, ka mokomawongkoko.

¹⁸ Tewala nahina mengkaaa, gagiomo mo'ila palili. Me'uraomo mia anu me'ini a songka.

¹⁹ Butu koa saru luwuno pau asa mia ata nahi pinokopaguru, hangano maupo ipokonto'orio, nahi perioo.

²⁰ Ukitao mia anu magasi mepau? Hadioopo pomperorohino mia monge-monge sekonopo a mia atuu.

²¹ Isema metondaio atano mompu'u da imongura, poko'ariano mokogagio motea ulu.

²² Anu mara ntekuda moweweu pe'u'uaa, ka mia anu liu tekuda, hadio polimpa'ino.

²³ Pompelangka-langkai mompe'uru-uru mia, sine mia anu me'urumako, montarima po'unde-unde.

²⁴ Isema montarima tia inso a mia monako, umo'aliaakono koroino; irongeomo pontotonaa ka ipesakosii, sine nahi pompau.

²⁵ Doito a mia mowawa oho, sine isema me'ala-ala Ira i Ue, kinadudui.

²⁶ Hadio mia mepeto'ori a anu pabawa, sine inso ndi Ondae i Ue mia montarima moleoa.

²⁷ Mia mentee mokoburuakono mia benge-benge; mia mosa'o gauno mokoburuakono anu moleo pesalaano.