Powadi 28 - Wunta Mempori

¹ Mia mosa'o gauno molai maupo nahina anu lumuluo, sine mia mentee mosia kana singa mongura.

² Hangano pe'ewa i wita atuu hadioomo anu pabawa, sine hangano mia anu hinao ponto'oriono ka hinao pandeno mekorahakoomo te'atoraa.

³ Mia mongkokolaro anu mompokonsii mia molema onaemo kana usa marombo, sine nahi pompowee kaanga.

⁴ Mia anu nahi perioo songka umunde-undeo mia mosa'o gauno, sine mia anu me'ini a songka umewai ira.

⁵ Mia mosa'o wineweuno nahi pokonto'orio moleoa, sine mia anu umungke Ira i Ue mokonto'orio luwuakoano.

⁶ Moikoopo mia mongkokolaro anu nahina tataano peleluno sekonopo mia anu melengku-lengkuako pesalaano, maupo onae kaea.

⁷ Mia anu mekariao songka onaemo ana anu hinao ponto'orino, sine mia anu mebawaaako anu modoko mongkaa mokoko'iio amano.

⁸ Mia anu mokohadioakono bungano doi ke untu arataano, pumpuo atuu tiano mia anu mehohawao mia molema.

⁹ Isema anu wolilio birino ka si rongeo songka, pekakaino mbo'u mokoburu.

¹⁰ Isema mokontesaao mia moleo a mpesalaa anu mosa'o ta tedonta a laro aano onaeno, sine mia anu nahina tataano ta me'ueo me'uraa.

¹¹ Mia kaea potaeno onae pande mosongka, sine mia mongkokolaro anu hinao ponto'orino ito'orio.

¹² Tewala mia mentee monangi, hadioomo po'unde-undedo mia, sine tewala mia mosa'o gauno mohawe pabawa, mia mpewuni.

¹³ Isema wunio halano nahi ta me'ura, sine isema mangakuakono ka bintao ta pinehohawa.

¹⁴ Me'uraomo mia anu wela doitoako Ira i Ue, sine mia anu mokomoteao aroano ta tedonta a laro masolaa.

¹⁵ Kana singa anu mengaoli ke berua anu mesapoi, kanatuumo mia mosa'o gauno anu moparenta palili anu molema.

¹⁶ Asa petewawa nahina ponto'orino, lansara pompokonsiino; sine mia anu umo'aliaakono untu anu nahi moleo insoano, melai tinuwuno.

¹⁷ Mia anu montanggumi reano mia susua ta molai hawe a laro ngkaburu. Si ontoo!

¹⁸ Isema tuwu nahina tataano ta kinadudui, sine isema melengku-lengkuako pesalaano ta tedonta a laro aa.

¹⁹ Isema mo'angga wita ta mowohiako kaanga, sine isema mo'ungke anu nahina tuduno ta mowohiako mongkokolaroa.

²⁰ Mia anu pine'ala-ala mohawe hadio ronso, sine mia anu ineheno ronga kaea, nahi ta tola inso a mpohuku.

²¹ Mobini-biniki nahi moiko, sine hangano asa mpole roti mia moweweu hala.

²² Mia anu mo'uri madara mo'ungke arataa, ka nahi to'orio nine onae ta umaluo makuraa.

²³ Isema mongkuahako mia ta mohawe pompehohawa sekonopo mia anu monsila'e.

²⁴ Isema morontu amano ka ineno ka tumuduo nine atuu komba hala, onae walino anu monsolangi.

²⁵ Mia anu modoko, moweweu pe'u'uaa, sine isema me'ala-ala Ira i Ue, pinoweeako hadio ntu'u.

²⁶ Isema me'ala-alao aroano onaeno onaemo mia monge-monge, sine isema tuwu saru pande mosongka ta tekadudui.

²⁷ Isema mompowee a mia mongkokolaro nahi ta mompemakura, sine mia anu tumutuwio matano ta tedoa tinotonaa.

²⁸ Tewala mia mosa'o gauno mohawe pabawa, mia mpewuni, sine tewala ondae memate, tetiangiomo hadio mia mentee.