Powadi 27 - Wunta Mempori

¹ Si unde-undeo koroimu mongkona tisomo, hangano nahi uto'orio hapa anu ta gagi oleo atuu.

² Po'ineeomo mia susua umunde-undeko ka komba ngangamu, mia anu nahi uto'orio ka komba wiwimu omuemu.

³ Watu atuu mobea ka maupo one mobea, sine mobeaopo sekonopo oruano onaemo mahaki aroa a mia benge-benge.

⁴ Mokula aroa lambaha ka tekuda umaluo, sine isema mokompopetea a monsiri?

⁵ Moikoopo pekuahako i arono sekonopo pompehohawa anu tewuni.

⁶ Asa mia wali-wali mobelai saru tinoo moiko, sine asa iwali mewoo-woo laloomo lahi.

⁷ Mia anu mowohi mololanda siu hoani, sine a mia anu mokoninggo maupo luwuno anu mopa'i mo'ahi namino.

⁸ Kana manu-manu anu molai inso a nsenono, kanatuumo mia molai inso a mpo'iangano.

⁹ Lana ka anu mana mo'ahi ineheno aroa, sine marasaia moberi sumanga.

¹⁰ Si bintao walimu ka walino amamu. Si aiwa a rahano pepaekompomu i tempono omue urasa'o. Moikoopo pehori raha anu umpeda sekonopo pepaekompo anu olai.

¹¹ Anaku, omue asalakono pande mosongka, pokonsanaaomo aroaku, ka kupokosangkio mia anu tumata aku.

¹² Tewala mia pande mo'ungke akala kumitao masolaa, onae mewuni, sine mia anu napi hina pinembasaino melempa mpiha, ka i'amba masola.

¹³ Alaomo sangkano mia anu tumanggumio mia susua, ka ontoomo atuu gagi pe'iniano mia hawe.

¹⁴ Isema mo'o-mo'oru ntu'u metabeako suara meroku a mpe'asa miano, ta pinotaeako kontongaano montotonaa.

¹⁵ Asa mia beineno anu ineheno me'u'ua mengkena saru matiti anu nahi penaa-naa mompo'iti i tempono usa.

¹⁶ Isema umontoo mo'onto angi, ka kae ngkoanano mokungku lana.

¹⁷ Labu mokomontasoo labu, mia mokomontasoo pe'asa miano.

¹⁸ Isema mompekaria keu ara ta mongkaa wuano, ka isema modagai ueno ta pinelangkai.

¹⁹ Kana uwoi montami rupa, kanatuumo aroano mia tumamio mia atuu.

²⁰ Tolinodo mia mate ka matea nahi hori tende, kanatuumo matano mia nahi hori tende.

²¹ Kawali kodei atuu pompokolonoa salaka ka pompotuwua api pompokolonoa wulaa, ka mia kinita montonda po'unde-unde anu iwineeako.

²² Maupo u'isaakono po'isa mia benge-benge, a laro nohu saru gandu, benge-bengeno nahi ta tetadi inso ndi onae.

²³ To'oriomo temoi-moiko teweweudo bawaano bembe bimbamu, pepentee iramo bawaano pinotuwumu.

²⁴ Hangano, arataa nahi ta mo'ia mpiha ka ramba-ramba ulu nahi ta mapa'api-api inule.

²⁵ Tewala ewo moliu ka tumba mongura tengkita, ka luwuno pinopaho a ntorukuno pinumpu,

²⁶ ka omue hinao luwuno bimba mongura wuluno ta pesangkamu ka luwuno bembe lakino po'oli lere,

²⁷ soompo uwoi uono bembe ta kaangamu ka kaangado somborimu, saru pepotuwudo beine anu mpekakaakomu.