Powadi 26 - Wunta Mempori

¹ Kana seru baku i tempono motu'i-tu'i ka usa i tempono konsowia, kanatuu koa mbo'u pompelangkai nahi tekona a mia monge-monge.

² Kana manu-manu dena menee ka manu-manu wowitu menee-nee, kanatuumo totonaa nahina pepu'uano nahi ta kona.

³ Ponsepi onaemo tiano ngara, sama tiano kalide, ka tarasulu tiano torukuno mia monge-monge.

⁴ Si sangkio mia monge-monge montonda benge-bengeno, ka si ugagi kana onae.

⁵ Sangkiomo mia monge-monge montonda benge-bengeno, ka si potae koroino pande mosongka.

⁶ Isema mo'oliwi pe'oliwi telalo a mia monge-monge puduo karuno onaeno ka mo'inu pobobarasaia.

⁷ Kanamo karuno mia pungku anu telupe, kanandimo powadi a ngangano mia monge-monge.

⁸ Kana mia mowutu watu a mpokembi, kanatuumo mia anu mompelangkai a mia monge-monge.

⁹ Kanamo rui anu dumuhuo kaeno mia molabu, kanatuumo powadi a ngangano mia monge-monge.

¹⁰ Kanamo puu pompana anu belaio sompo mia, kanatuumo onae anu moweeakono anggaa mia monge-monge ka luwuno mia anu telalo.

¹¹ Kana dahu mekule a ngkolua-luano, kanatuumo mia monge-monge anu walio benge-bengeno.

¹² Nde ukitaoke mia anu motae koroino pande mosongka? Pomperorohino mia monge-monge langkaiopo sekonopo a mia atuu.

¹³ Mia moluwe motae, ”Hinao singa a nsala! Hinao singa i tongano tanalapa!”

¹⁴ Kana tondo mewolili a henseno, kanatuumo mia moluwe a mpoturiano.

¹⁵ Mia moluwe umemoo kaeno a laro sempe, sine onae mokendo lahi ta mokuleo a ngangano.

¹⁶ Mia moluwe tumuduo koroino lalu pande mosongka sekonopo opitu mia anu sumangki kona ntu'u.

¹⁷ Kanamo mia anu morako birino dahu anu telalo kanatuumo mia anu mesalo-salo a mpengengeado mia susua.

¹⁸ Kana mia mekombe mepanaako pana api, pana mompepate,

¹⁹ kanatuumo mia anu mompopo'oo pe'asa miano ka motae, ”Ongkue butu memae-mae.”

²⁰ Tewala keu pingko, mate api; tewala nahina anu mompau nahi mentee, menaa-naaomo pe'u'uaa.

²¹ Kana halo tiano waro melanga ka keu tiano api, kanatuumo mia anu ineheno me'u'ua ka ipokomokulao pengengea.

²² Kana kaanga mo'ahi pauno anu mompau nahi mentee mewinso i laro aroa.

²³ Kana salaka menta'i labu umapiio siba ngkuro, kanatuumo wiwi mo'ahi saru aroa mosa'o.

²⁴ Anu mo'o'aliako mo'onde-ondeako wiwino, sine i laro aroano hinao pompopo'oo.

²⁵ Tewala mauru pepauno, si pe'ala-alao, hangano opitu mokoburua kongko i laro aroano.

²⁶ Maupo po'o'aliano itutuwio pompopo'oo, poweweuno mosa'o ta saba a laro bawaa.

²⁷ Isema mongkeke aa ta tedonta i larono, ka isema molundi watu, watu atuu ta mewolili dumunsio.

²⁸ Elo pegaupi umo'aliaakono ginaupino, ka nganga marampau mowawa masolaa.