Powadi 25 - Wunta Mempori

Luwuno powadino i Salomo anu pinumpudo pegawaino i Hisikia 25:1–29:27

¹ Tudano mbo'u andio luwuno powadino i Salomo anu pinumpudo pegawaino i Hisikia, mokoledo to Yehuda.

² Maramba-Do Ue Ala onaemo hinao anu tewuni, sine marambano luwuno mokole hinao pinepentee.

³ Kana mantandeno langi ka ondalono tolino, kanatuumo aroano luwuno mokole nahi pinokopepentee.

⁴ Tadiomo rege inso a nsalaka, ka hasilino weweuano puu mpo'angga salaka.

⁵ Tadiomo mia mosa'o gauno inso i arono mokole, ka morosoomo kadera poparentaano hangano moleoa.

⁶ Si pompelangka-langkai i arono mokole, ke mentade a mpo'iangado anu langkai potorono.

⁷ Hangano moikoopo mia mepau ndi omue, ”Pewuatakomo i ndi'ai,” sekonopo omue pine'uru-uru i arono mia pinelangkai. Hapa anu kinitano matamu,

⁸ si madara pekara-karaakono. Hangano a mpoko'ariano, hapake anu pinokoweweumu, tewala pe'asa miamu mokoko'iiko?

⁹ Korahakonomo kara-karamu a mpe'asa miamu atuu, sine si posabao rahasiano mia susua,

¹⁰ ka si domempasinggiriko mia anu rumongeko, ka pompepauikiako ndi omue nahi tetadi.

¹¹ Kana apeli wulaa a sempe salaka, kanatuumo pau anu pinau a tempo anu kona ntu'u.

¹² Kana sinsi wulaa ka peramba-ramba wulaa, kanatuumo pekuahakono mia pande mosongka a biri anu moronge.

¹³ Kana morinino seru baku i tempono konsowia, kanatuumo mia tinena anu metenunu a mia anu tumenao; onae mokorosoo aroado luwuno ueno.

¹⁴ Kana seru ka angi nahina usa, kanatuumo mia mompelangka-langkaiako pompowee anu nahi hori meweengakono.

¹⁵ Saru sabara ka ipokompe'alao asa mia anu pabawa ka pau molusa-lusa mompudu wuku.

¹⁶ Tewala omue mohawe siu hoani, pongkaamo sompoano, ka si mansa umowohiako lahi atuu, ka u'amba lumuao.

¹⁷ Si mararu aiwa a rahano pe'asa miamu, ka si te'osa, ka i'amba umo'aliaakomu.

¹⁸ Kanamo tuko, ke ponai, ke ana mpana anu montaso, kanandiomo mia anu mesakosii megaupi a mpe'asa miano.

¹⁹ Kanamo ngisi anu motopu ka karu anu telelu, kanandiomo pompe'ala-ala a mia mohapu pedandia a tempo ma'isoa.

²⁰ Kanamo mia anu lumohuo lembano i tempono morini, ka kanamo olo a mobela, kanandiomo mia anu menaniako penani tiano aroa anu masusa.

²¹ Tewala iwalimu mokoninggo, poweeakono roti ka ipongkaa, ka tewala onae mokoranga, poweeakono uwoi ka ipo'inu.

²² Hangano omue komohowu waro api a wawo uluno, ka Ondae i Ue Ira sumuloo moikoa atuu ndi omue.

²³ Angi utara mowawa usa marombo, mepau mewuni-wuni mowawa rupa tekuda.

²⁴ Moikoopo mo'ia a nsiuno atono raha sekonopo me'asa raha saru beine anu ineheno me'u'ua.

²⁵ Kanamo uwoi morini a mia anu mokoranga, kanatuumo lele moiko inso i wita anu olai.

²⁶ Kanamo mata uwoi anu mowewu ka insoano anu merege, kanatuumo mia mentee anu tedonta i arono mia mosa'o gauno.

²⁷ Mongkaa hadio siu hoani nahi moiko, kanatuu koa mbo'u mo'ungke luwuno pau po'unde-unde.

²⁸ Kanamo kota anu tebangku rere watuno, kanatuumo mia anu nahi pokompabawaio koroino.