Powadi 24 - Wunta Mempori

¹ Si mosisiriakono mia mosa'o wineweuno, si behe pebawaako ira.

² Hangano aroado pompewowolo pompokonsii ka wiwido mpompau sinongka mosa'o.

³ Saru ponto'ori anu mentee raha pinontade, ka pinokomoleoako ponto'ori.

⁴ Saru ponto'ori luwuno bolongko inihiiako mperupa-rupa arataa anu masuli olino ka tekosi.

⁵ Mia pande mosongka pabawaopo sekono mia moroso, ka mia anu hinao ponto'orino sekonopo mia anu rosono langkai moroso.

⁶ Hangano butu koa saru akala omue mokompetea, ka ponangia pinerorohi a hadiono anu mompatudu.

⁷ Ponto'ori anu mentee mantande lahi a mia benge-benge; onae nahi ungkahio ngangano a mpewowa langkai.

⁸ Isema wela mosongka mosa'oa ta pinotaeako anu mompopo'oo.

⁹ Mompewowolo benge-bengea onaemo hala, ka anu pasinggiri onaemo mokoburuakono mia.

¹⁰ Tewala tetadi rosomo i tempono ma'isoa, tedoa kodei rosomu!

¹¹ Potola ira anu mewinawa ira mempinepate, kaduduio mia anu mobangku-bangku te'aro a po'impahia.

¹² Tewala omue mepau, ”Mentee ntu'u nahi kimento'orio mongkona atuu!” Ondae anu paresao aroa nde nahi Dopokonto'orioke? Ondae anu dumagaio sumangamu nde nahi Doto'orioke, ka sumuloakono mia montonda wineweuno?

¹³ Anaku, kaanomo siu hoani, hangano onae atuu moiko; ka te'itino siu hoani atuu mo'ahino langirano ngangamu.

¹⁴ To'oriomo, kanatuu koa mbo'u ponto'ori anu mentee tiano sumangamu: Tewala uhaweo, ta hina oleo lembuimu, ka pomperorohimu nahi ta tetadi.

¹⁵ Si poporoo po'iangano mia mentee, hei mia mosa'o gauno, si solangio rahano.

¹⁶ Hangano, maupo pepintu itedonta mia mentee, onae wali mewangu, sine mia mosa'o gauno ta tebangku a laro masolaa.

¹⁷ Si po'unde tewala iwalimu tedonta, si mawongko aroamu tewala onae tedonta,

¹⁸ ka si Dokitao i Ue ka Dopemosa'oo, ka Do'amba wolilio tekuda-Do inso a mia atuu.

¹⁹ Si gagi tekuda hangano mia anu moweweu hala, si mosisiriakono mia mosa'o gauno.

²⁰ Hangano nahina oleo lembuino mia moweweu mosa'o; huluno mia mosa'o gauno ta mate.

²¹ Hei anaku, doitoako Iramo i Ue ka mokole; si ewaio oruano.

²² Hangano nahi kinoo-koo ondae moweweu masolaa, ka isema tumo'orio masolaa anu winawado?

²³ Tudano mbo'u andio luwuno powadino mia pande mosongka. Mobini-biniki a laro mpebitaraa nahi moiko.

²⁴ Isema mepau a mia mosa'o gauno, ”Nahina salamu,” ira mentotonaao luwuno tongku, domentutundalio luwuno suku tongku.

²⁵ Sine ondae anu mpompowee pepopoto'ori ira meme'ura, ka ronso manangaia ta metii ndi ondae.

²⁶ Isema mompowee sangkino anu kona ntu'u winoo-woo wiwi.

²⁷ Pokomoikoo anggaamu i bungkuno, patindaomo atuu tiamu i lere; umarino atuu ka u'amba montadeo rahamu.

²⁸ Si gagi sakosii a mpe'asa miamu nahina pu'uno, ka mompopo'ooako wiwimu.

²⁹ Si pepau, ”Kana'umpe ipokoko'ii aku, kanatuu kupokoko'iio. Aku mombalo a mia menunu saru wineweuno.”

³⁰ Kulaloo lereno asa mia anu moluwe ka lere anggorono mia anu nahi molino pinewowolono.

³¹ Kitaomo, luwuno atuu tuwuomo ewo merui, witano tetutuwiako ewo rui, ka rere watuno tebangkuomo.

³² Mengkita aku ka mepenteeo, kukitao ka mo'ala asa pepaguru.

³³ ”Tede-tedei moturi, tede-tedei mongkokoturi, tede-tedei mekopu-kopu'aro, ka ipepombole mpiha,”

³⁴ ka haweomo mongkokolaro ndi omue kana ponsapoi, ka makuraa kana mia anu meparewa mpetea.