Powadi 23 - Wunta Mempori

¹ Tempono omue mentoro mongkaa saru asa mia langkai potorono, pekokoongakono temoiko hapa anu hina i aromu.

² Naaomo asa piso a we'umu, tewala langkai aroamu mingki mongkaa!

³ Si mosisiriakono kaanga anu mo'ahi, onaemo atuu kaanga pinatinda anu mompopo'oo.

⁴ Si pe'isei ka ugagi kaea, bintaomo tinoomu andio.

⁵ Tewala upepenteeo, onae moliu, hangano onae mansa mepani, ka i'amba menee i laro meene kana rajawali.

⁶ Si pongkaa rotino mia anu modoko, si mosisiriakono kaangano anu mo'ahi.

⁷ Hangano kana mia anu moweweu poreke a ngkoroino, kanatuumo onae. ”Pongkaamo ka po'inu,” ipotae ndi omue, sine aroano nahi bobotoli ndi omue.

⁸ Asasumpu anu kinaamu kolumuao, ka luwuno paumu anu mo'ahi utadi-tadio.

⁹ Si pepau a birino mia monge-monge, hangano ta meruanahio luwuno paumu anu pande mosongka.

¹⁰ Si limbao tidano wita anu tehine, ka mewinsokio lereno nana'ote nahina amano.

¹¹ Hangano pontolosido moroso, Ondaemo anu umala-alaakono kara-karado umewaiko.

¹² Po'aroomo pinewowolomu a pompaguru, ka birimu a luwuno pau ponto'ori.

¹³ Si o'ondahao paguruo anamu; nahi ta mate tewala usepiakono lauro.

¹⁴ Omue sumepiakono lauro, sine penaano ukaduduio inso a ntolinodo mia mate.

¹⁵ Hei anaku, tewala aroamu pande mosongka, aroaku mbo'u mawongko.

¹⁶ Sumangaku mo'unde, tewala wiwimu mompau anu moleo.

¹⁷ Si mosisiri aroamu a mia anu ntehala, sine doitoako Iramo mpiha i Ue.

¹⁸ Hangano oleo lembuiano mentee ntu'u hinao, ka pomperorohimu nahi ta tetadi.

¹⁹ Hei anaku, rongeomo, ka gagimo pande mosongka, po'aroomo aroamu a mpesalaa anu mentee.

²⁰ Omue si kongko i olodo anu mpo'inu anggoro ka mangoso mongkaa bau.

²¹ Hangano mara mpo'inu ka mangoso mongkaa gagi mongkokolaro, ka mongkokoturi weweuo mia mesangka teberi-beri.

²² Rongeomo amamu anu me'anaakomu, ka si pokongkodeio inemu tewala mota'uomo.

²³ Oliomo menteea ka si asao; kanatuu koa mbo'u ponto'ori anu mentee, pompaguru ka ponto'ori.

²⁴ Amano asa mia anu mentee ta kokora-kora; anu me'anaako ira mia anu pande mposongka ta mo'unde hangano onae.

²⁵ Po'ineeomo ka dopo'unde amamu ka inemu, po'ineeomo ka imawongko onae anu me'anaakomu.

²⁶ Hei anaku, weeakunemo aroamu, po'ineeomo matamu sanaakono luwuno pesalaaku.

²⁷ Hangano beine belesu onaemo aa anu ondalo, ka beine lansara onaemo sumuru anu ma'iso.

²⁸ Tendeano, kana puu porontu ipontowoki, ka mokohadioo anu mohapu pedandia i olodo mia.

²⁹ Isema mompe'adodo? Isema mompemasusa? Isema mengenge? Isema moluarako pinemasusano? Isema mobela nahina pu'uno? Isema motaha matano?

³⁰ Ondae atuu anu mpentoro-toro saru anggoro hawe tehine wongi, ondae anu mehawe mpo'inu anggoro sinalo.

³¹ Si kitao anggoro butu hangano motaha, mangkilo a laro sangkiri, ka waa mewinso saru menami,

³² sine lembuino metungku kana ule, ka mewurosiako ipo kana ule mo'ito.

³³ Ka i'amba matamu ta kumita ira anu kinohali-haliako, ka aroamu pau ira pau anu nahi te'atora.

³⁴ Omue kana mia i tongano bombano tahi, kana mia a wawo karuno sombano kapala.

³⁵ Omue komotae, ”Mia sumepi aku, sine nahi kupompemahaki. Mia tumunduhi aku, sine nahi kupembasaio. Te'ipiake kupekaangako? Aku mo'ungke mbo'u anggoro.”