Powadi 22 - Wunta Mempori

¹ Nee moiko masuliopo olino sekonopo kaeaa langkai, ipehohawao mia moikoopo sekonopo salaka ka wulaa.

² Mia kaea ka mia mongkokolaro hinao pengkenano: Ondae koa i Ue anu mokogagi ira luwu.

³ Tempono mia anu pande mo'ungke akala kumitao masolaa, onae mewuni, sine mia anu napi hina pinembasaino melempa mpiha, ka i'amba kumonao masolaa.

⁴ Tambono me'urumako ka doitoako Ira i Ue onaemo kaeaa, pompelangkai, ka tuwua.

⁵ Rui ka pompete'umala hinao a mpesalaano mia anu molengku aroano; isema mingki mekariao koroino i'olaiakono mia atuu.

⁶ Paguruomo mia mongura montonda pesalaa anu pototono, ka maupo tempono imota'u nahi ta pansia inso a mpesalaano atuu.

⁷ Mia kaea pabawaio mia mongkokolaro, anu mepasua gagi atano mia anu mokompepasuao.

⁸ Mia anu morawo molengkua ta mohawe masolaa, ka tuko tekudano ta tampula.

⁹ Mia anu moiko aroano ta rinonso, hangano onae tumiao hinaweno saru mia mongkokolaro.

¹⁰ Saariomo anu mompasinggiri, ka tampulaomo pe'u'uaa, ka tamo menaa-naa pengengea ka pasinggiri.

¹¹ Mia anu mongkekewoi memporino aroa ka anu mo'ahi pepauno gagi sambe'eno mokole.

¹² Mata-Do i Ue mepenteeo ponto'ori, sine nahi Dopokogagio pinauno anu mompau anu mohapu pedandia.

¹³ Anu moluwe motae, ”Hinao singa i bungkuno, ta merangkami aku i tongano tanalapa.”

¹⁴ Ngangano beine belesu onaemo aa anu ondalo; mia anu Dotekudaakono i Ue ta tedonta i larono.

¹⁵ Benge-bengea metako a aroano mia mongura, sine tuko pompaguru ta moko'olaio atuu inso ndi onae.

¹⁶ Mia anu mompokonsii mia molema ka ime'uraakono koroino ke moweeakono pompowee a mia kaea, butu mokorugio mpena koroino.

Luwuno powadino mia pande mosongka 22:17–24:34

¹⁷ Ta'oomo birimu ka rongeomo pauno mia pande mosongka, pekokoongakonomo a ponto'oriku.

¹⁸ Mompokosanaa ntu'u tewala imenaao i laro aroa ka luwuno atuu tepatinda a wiwimiu.

¹⁹ Ka unaao pompe'ala-alamu ndi Ondae i Ue, kupaguruakomu kanandio-andio, oo ndi omue.

²⁰ Kombake kuburiomo ndi omue i ndi'ipua tolupulu pau anu me'ihi patudu ka ponto'ori,

²¹ ka ipaguruakomu hapa anu mentee ka pinokompe'ala-ala, ka upokosangkio anu kona ntu'u a anu tumenako.

²² Siimo rontuo mia molema hangano onae molema, ka siimo lolandao mia mongkokolaro a mpewowa langkai.

²³ Hangano Ondae i Ue umala-alaakono kara-karado, ka umalao penaano mia anu rumontuki ira.

²⁴ Si pewali-waliakono mia anu ronga mewuatako reano, si pebawaakono mia mara ntekuda,

²⁵ ka si utondao peleluno ka tuma'oo oho tiano koroimu omuemu.

²⁶ Omue si tewinso i olodo mia anu mpoweweu tepo'asaa mpau, ka anu gagi tumembio pasua.

²⁷ Tewala nahina hapa-hapamu wali po'owahimu, mia ta umalao poturiamu inso i totomu.

²⁸ Omue si limbao tidano wita anu tehine, anu pinakosido uempu'umu.

²⁹ Horikoke mongkita mia anu pande ntu'u a laro mpo'anggaano? I arodo luwuno mokole onae ta mentade, komba i arodo mia anu pinokongkodei.