Powadi 21 - Wunta Mempori

¹ Aroano mokole kana waaano uwoi a laro ngkae-Do i Ue, Dopowaao isuamo koa inehe-Do.

² Sompo pesalaano mia moleo montonda pohaweno onaeno, sine Ondae koa i Ue anu paresao aroa.

³ Moweweu menteea ka moleoa Dopemoikoopo i Ue sekonopo pesomba.

⁴ Mata mompelangka-langkai ka aroa konangi-nangi, anu gagi huluno mia mosa'o gauno, onaemo hala.

⁵ Sinongkano mia mokua manasa mohawe hadio ntu'u, sine sompo mia anu madara manasa mompembasai makuraa.

⁶ Arataa hinaweako elo megaupi onaemo laho anu moliu inso a mia anu mo'ungke matea.

⁷ Mia mosa'o gauno irendeo pobobarasaido, hangano nahi domebehe mpoweweu moleoa.

⁸ Melengku-lengkuako pesalaano mia anu sala, sine mia nahina tataano moleo wineweuno.

⁹ Moikoopo mo'ia a nsiuno atono raha sekonopo me'asa raha saru beine ineheno me'u'ua.

¹⁰ Aroano mia mosa'o gauno mosisiriakono wineweu mosa'o ka nahi ipe'aroa a mpe'asa miano.

¹¹ Tewala anu mompasinggiri hinuku, mia anu napi hina pinembasaino gagi pande mosongka, ka tewala mia pande mosongka pinoweeako pompaguru, onae ta mohawe ponto'ori.

¹² Anu Tedoa Moleo mekokoongakono rahano mia mosa'o gauno, ka dumontaio mia mosa'o gauno a laro masolaa.

¹³ Isema umonsoo birino a mperaalikino mia molema, nahi ta montarima sangkino, tewala onaeno meboo-booli.

¹⁴ Pompowee mewuni-wuni mepateo mosa'ono aroa, ka pompowee anu nahi pototono menoro-noroako mokomolusao bamburu anu lansara.

¹⁵ Moweweu moleoa onaemo po'undeno mia mentee, sine mokodoitoo mia anu moweweu mosa'o.

¹⁶ Mia anu pansia inso a nsala pinewowolo molino ta mo'ia a mpo'ianga pepumpuado onituno mia mate.

¹⁷ Mia anu ineheno mesana-sanaa ta mompemakura, mia anu ineheno lana ka anggoro nahi ta gagi kaea.

¹⁸ Mia mosa'o gauno pinake gagi tolosino mia mentee, ka anu mohapu pedandia gagi euno mia moleo.

¹⁹ Moikoopo mo'ia i pada one sekonopo mo'ia saru beine anu ineheno me'u'ua ka mara ntekuda.

²⁰ Arataa anu tekosi ka lana hinao a mpo'iangano mia pande mosongka, sine mia monge-monge nahi ponto'ori umu'uri-urio.

²¹ Isema umungkeo menteea ka pompehohawa ta mohawe tuwua, menteea, ka pompelangkai.

²² Mia pande mosongka polio monsapoi kotado sorodadu, ka mobangkuo bente anu pinerorohido.

²³ Isema dumagaio ngangano ka elono, mekariao koroino inso a masukaraa.

²⁴ Mia mompelangka-langkai ka konangi-nangi ”Anu mompasinggiri” neeno, onae meleluako pompelangka-langkai anu laloomo lahi.

²⁵ Anu moluwe ipepateo ineheno, hangano kaeno mo'ondaha mo'angga.

²⁶ Po'eheno tesingka asa oleo, sine mia mentee mompowee nahina tompaano.

²⁷ Pesombano mia mosa'o gauno atuu mokoburu, tamoako mbo'u tewala pinesombaako a ntinoo anu mosa'o.

²⁸ Sakosii megaupi ta mate, sine posakosiino mia anu rumongeo ta tumantuio.

²⁹ Mia mosa'o gauno mokapa rupano, sine mia moleo umatorao pesalaano.

³⁰ Nahina ponto'ori anu mentee ka ponto'ori, ka nahina pontimbanga anu mokompengkenaako Ira i Ue.

³¹ Ngara pinatinda tiano oleo peteaa, sine ponangia kongko a ngkae-Do i Ue.