Powadi 20 - Wunta Mempori

¹ Anggoro atuu pasinggiri, inua mokora atuu mompokogagi pohohoi, nahi komba pande mosongka mia anu kobangku-bangku hangano onae.

² Doitoa inso ndi mokole kana pengaolino singa mongura, isema mokotesingkao tekudano sumolangio koroino onaeno.

³ Pinelangkaiomo asa mia anu olaiakono pe'u'uaa, sine sompo mia benge-benge pu'uo pengengea.

⁴ A pompu'uano wula usa anu moluwe nahi pompadeko; onae mo'ungke i tempo konsowia, sine nahi pohawe hapa-hapa.

⁵ Sinongka i laro aroano mia atuu kana uwoi anu ondalo, sine mia anu hinao ponto'orino mokotambuo.

⁶ Hadio mia pauo koroino me'aroa, sine mia anu metenunu, isema mokohaweo?

⁷ Mia anu mentee nahina tataano peleluno, me'uraomo inuleno.

⁸ Mokole anu mentoro a wawo ngkadera pobitaraa mokonto'oriakono matano luwuno anu mosa'o.

⁹ Isemake polio motae, ”Kupokomorinaomo aroaku, mempori aku inso a halaku?”

¹⁰ Orua rupa watu pontimba, orua rupa ponsa'u, oruano Domokoburuakono i Ue.

¹¹ Nana'ote mbo'u pinokonto'oriomo inso a wineweuno, ba nahina tataano ka moleo peleluno.

¹² Biri anu moronge ka mata anu mongkita, oruano Doweweuo i Ue.

¹³ Si butu poturi ka si utendonta mongkokolaro, wileomo matamu ka komowohiako kaanga.

¹⁴ ”Nahi moiko! Nahi moiko!”, ipotae anu mo'oli, sine mansano lumako, i'unde-undeo koroino.

¹⁵ Maupo hinao wulaa ka hadio paramata, sine peramba-ramba masuli olino onaemo wiwi anu hinao ponto'orino.

¹⁶ Alaomo sangkano mia anu tumanggumio mia susua, ka onae si potolao gagi mia tinawa euno mia hawe.

¹⁷ Roti hasilino pompopo'oo mo'ahi namino, sine lembuino ngangano bukeako one.

¹⁸ Sinongka pinakosiako pontimbanga, onaemo pu'uno peteamo saru akala.

¹⁹ Isema mompau nahi mentee, momposaba rahasia, onaemo pu'uno si pebawaako mia anu hadio pauno.

²⁰ Isema montotonaa ama ke ineno, huluno ta mate i tempono wongi-wongi.

²¹ Pine'ue anu magasi ihinawe a pompu'uano, poko'ariano nahi rinonso.

²² Si potae, ”Aku sumuloo wineweu mosa'o,” sikori Iramo i Ue, Ira kumaduduiko.

²³ Orua rupa watu pontimba Domokoburuakono i Ue, ka ponsa'u anu molengku atuu nahi moiko.

²⁴ Pelempano mia inso ndi Ondae i Ue, ka i'amba kana'umpe mia ka ipokonto'orio sala ntumuwuno?

²⁵ Asa oho tiano mia tewala nahi pompewowolo ka ipotae, ”Mempori,” ka i'amba montimbanga umarino montanga.

²⁶ Mokole anu pande mosongka mokonto'ori ira mia mosa'o gaudo, ka ileloako ira roda ponsesaa.

²⁷ Penaano mia onaemo hulu-Do i Ue, anu mepenteeo luwuno laro aroa.

²⁸ Pompehohawa ka petenunu kumaduduio mokole, ka saru pompehohawa ipokorosoakono kadera poparentaano.

²⁹ Peramba-rambano mia mongura onaemo rosono, ka tekosino mia mota'u onaemo uwa.

³⁰ Luwuno hanga mpesepia anu merea mokomorinao mosa'oa, ka petunduhi mokomorinao laro aroa.