Powadi 19 - Wunta Mempori

¹ Moikoopo asa mia mongkokolaro anu peleluno nahina tataano sekonopo asa mia monge-monge anu mara mpegaupi.

² Nahina ponto'ori anu wineweu mbo'u nahi moiko; mia anu madara ta sala mpelempa.

³ Benge-bengeno onaeno mia atuu mokontesaao pesalaano, sine aroano tekuda ndi Ondae Ue.

⁴ Kaeaa montiangi hadio sambe'e, sine mia mongkokolaro ibintao sambe'eno.

⁵ Sakosii megaupi nahi ta tola inso a mpohuku, mia anu mepuuriako pegaupi nahi ta tola.

⁶ Hadio mia mo'ala aroano mia mokua mompowee, sompo mia mesambe'e saru anu mompowee.

⁷ Mia mongkokolaro dome'o'aliaakono luwuno pepaekompono, tamoako mbo'u luwuno sambe'eno me'olaiakono. Ilulu ira, moboi ira sine nahi domekongko mbo'u.

⁸ Isema mohawe pinewowolo molino, mehohawao koroino; isema me'ini a ponto'ori, mohawe me'uraa.

⁹ Sakosii megaupi nahi ta tola inso a mpohuku, mia anu mepuuriako pegaupi ta mate.

¹⁰ Mare'ea nahi pototono mia monge-monge, tamoako mbo'u asa ata moparenta anu langkai potorono.

¹¹ Pinewowolo molino weweuo asa mia tedoa sabara ka marambano onaemo nahi kitaakono polimpaia.

¹² Tekudano mokole kana pengaolino singa mongura, sine moikono kana tontoru a wawo ewo.

¹³ Ana monge-monge onaemo masolaano amano, ka pewurukino asa mia beineno kana matiti anu nahi penaa-naa mompo'iti.

¹⁴ Raha ka arataa onaemo pusakado uempu'u, sine beineno anu molino pinewowolono inso koa ndi Ondae i Ue.

¹⁵ Meluweki mowawa poturi rodo, ka mia anu mongguu ta marasai mokoninggo.

¹⁶ Isema me'ini a parenta, mekariao penaano, sine isema montata pau, ta mate.

¹⁷ Isema me'aroa a mia mongkokolaro, moweeako Ira i Ue owahia-Do anu ta sumuloo wineweu atuu.

¹⁸ Tunduhiomo anamu tempono da hinao pomperorohia, sine si ineheakono mateano.

¹⁹ Mia anu magasi lahi tekuda ta kona denda, hangano tewala komingki tumulungio, butu kotumiangio tekudano.

²⁰ Rongeomo patudu ka tarimaomo pompaguru, ka ugagi pande mosongka i oleo lembuiano.

²¹ Hadioomo sinongka i aroano mia, sine pomputusi-Do koa i Ue anu gagi.

²² Pelelu anu pinemoiko a asa mia onaemo petenunu; moikoopo mia mongkokolaro sekonopo mia megaupi.

²³ Doitoako Ira i Ue mowawa tuwua, onaemo ka itende mia mewongi, nahi aluo masolaa.

²⁴ Anu moluwe umemoo kaeno a laro sempe, sine nahi pokuleo mbo'u a nganga.

²⁵ Tewala anu mompasinggiri utunduhio, ka i'amba mia anu napi hina pinembasaino gagi pande mosongka, tewala mia hinao ponto'orino kinuahako, onae gagi mokonto'orio.

²⁶ Ana anu mobobarasai amano ke monsaari ineno, mokoko'iio ka moweweu tataano koroino.

²⁷ Hei anaku, siimo mbo'u poronge pompaguru tewala omue pansia mbo'u inso a luwuno pau anu mompowee ponto'ori.

²⁸ Sakosii anu nahi mentudu mompasinggiri songka ka ngangano mia mosa'o gauno montele pegaupi.

²⁹ Pohuku tetinda tiano anu mompasinggiri ka petunduhi tiano torukuno mia monge-monge.