Powadi 18 - Wunta Mempori

¹ Mia anu mo'ia asa-asano, mo'ungke ineheno, mosa'ono aroano mansa gagi a sompo pontimbanga.

² Mia monge-monge nahi behe a ponto'ori, butu ineheno popauo ihino aroano.

³ Tewala hawe gau mosa'o, haweomo mbo'u pompokongkodeia ka mokoko'iia tinondaako pompasinggiri.

⁴ Pepauno ngangano mia kana uwoi anu ondalo, sine pepu'uano ponto'ori anu mentee kana korono anu bubulaka.

⁵ Nahi moiko me'alaako a mia mosa'o gauno ka mia mentee nahi tinarima a mpebitaraa.

⁶ Wiwino mia monge-monge mompokohina pe'u'uaa, ka ngangano mebooli mo'ema petunduhi.

⁷ Mia monge-monge pinepate hangano ngangano, wiwino onaemo ohono penaano.

⁸ Pauno anu mompau nahi mentee kana kaanga mo'ahi, anu mewinso a laro kompo.

⁹ Mia anu meluweki a laro mpo'anggaano gagiomo pepaekompono anu monsolangi.

¹⁰ Nee-Do i Ue onaemo menara anu moroso, i ra'aimo polaiano mia mentee ka itekadudui.

¹¹ Kota anu moroso a mia kaea onaemo arataano ka kana rere watu anu mantande montonda potaeno.

¹² Pompelangka-langkai mese'elungio tekale-kalea, sine pe'urumako mese'elungio pompelangkai.

¹³ Tewala asa mia sumangki se'eluno irongeo, onaemo benge-bengea ka tataano.

¹⁴ Mia anu moroso aroano mokotembio marasaino, sine anu tetadi rosono, isema mokompomuleo?

¹⁵ Aroano mia hinao ponto'orino mohawe ponto'ori, ka birino mia pande mosongka mo'ungke ponto'ori.

¹⁶ Pompowee mo'ungkahi pesalaano mia, wawao me'aro a luwuno mia langkai potorodo.

¹⁷ Anu amba-ambano mepau a laro asa pe'u'uaa tengkita mentee, ranta hawe mia susua ka mepenteeo kara-karano.

¹⁸ Undi mokompenaa-naao pengengea, ka umoloti ira mia mempabawa.

¹⁹ Pepaekompo anu pinokomahaki motungkoopo inumpedaako sekonopo kota anu moroso, ka pengengea atuu kana lansono pewowa langkaino asa bente.

²⁰ Inso a hasilino ngangano kompono asa mia pinokomowohi, hasilino wiwino mokomowohio.

²¹ Tuwu ka mate ipabawaio elo, isema ineheno pakeo, ta kumaano wuano.

²² Isema mohawe beineno, mohawe me'uraa, ka Dopemoikoo i Ue.

²³ Mia mongkokolaro mepau mepepehohawa, sine mia kaea sumangki nahi pontudu.

²⁴ Hinao wali-wali anu mowawa masolaa, sine hinao sambe'e anu rangkuopo sekono asa mia pepaekompo.