Powadi 17 - Wunta Mempori

¹ Moikoopo asa mpole roti mokari tinondaako rodoa, sekonopo raha buke kaanga tinondaako pengengea.

² Ata anu molino pinewowolono ta pabawa a ana anu moweweu mokoko'iia, ka ta mohawe tia pusaka meronga luwuno pepaekompono ana atuu.

³ Kawali kodei atuu pompokolonoa salaka ka pompotuwua api pompokolonoa wulaa, sine Ondaemo i Ue anu paresao aroa.

⁴ Mia anu moweweu mosa'o mekokoongakono wiwi mompau anu mosa'o, anu megaupi monta'o biri a elo anu monsolangi.

⁵ Isema mompoponggari-nggari mia mongkokolaro mompokokodei Anu Mokogagio; isema mawongkoakono masolaa nahi ta tola inso a mpohuku.

⁶ Ramba-ramba uludo mia mota'u onaemo inuledo ka pelangkaido nana'ote onaemo uempu'udo.

⁷ Nahi pototono mia monge-monge mompau luwuno pau anu moiko, tamoako mia pinelangkai mompau luwuno pau pegaupi.

⁸ Pompowee anu nahi pototono atuu kana kilowu a matano anu moweeakono, maupo isua iwolilio rupano, onae mehasili.

⁹ Isema montutuwi polimpaia, mo'ungke pesambea, sine isema mo'ungke-ungkeako, teponsuaakono sambe'e moroso.

¹⁰ Asa powurarai mewinsoopo a mia hinao ponto'orino sekonopo asa etu petunduhi a mia monge-monge.

¹¹ Mia buunto butu mo'ungke mosa'oa, sine asa mia tinena anu lambaha ta inoliwi ndi onae.

¹² Moikoopo tepotowo saru berua waino anu tetadi anano, sekonopo saru mia monge-monge a laro benge-bengeno.

¹³ Isema monsuloako wineweu moiko saru wineweu mosa'o, wineweu mosa'o nahi ta olai inso i rahano.

¹⁴ Mompu'u pengengea kana mo'ungkahi pesalaano uwoi; gagi ponsukamo se'eluno ipompu'u pe'u'uaa.

¹⁵ Mokomenteeo mia mosa'o gauno ka mokonsalao mia mentee, oruano Domokoburuakono i Ue.

¹⁶ Hapa tuduno doi a ngkaeno mia monge-monge? Nde ta mo'oliako ponto'ori anu menteeke sekono onae nahi molino pinewowolono?

¹⁷ Asa mia sambe'e onaemo mia mehohawao sompo tempo, ka asa mia pepaekompo pine'anaako tiano tempo masusa.

¹⁸ Mia anu nahi molino pinewowolono onaemo onae anu moweweu tepo'asaa mpau, anu gagi pontembi a mpe'asa miano.

¹⁹ Isema ineheno polimpa'ia, ineheno koa mbo'u pengengea, isema mokomantandeo pewowano mo'ungke tekale-kalea.

²⁰ Mia anu molengku aroano nahi ta mohawe ura, mia anu mapabali pinauno ta tedonta a laro masolaa.

²¹ Isema mohawe ana anu monge-monge, mohawe susa, ka nahi ta mawongko amano mia benge-benge.

²² Aroa anu mawongko onaemo pakuli anu alapi, sine anu tetadi rosono mompokomokari wuku.

²³ Mia mosa'o gauno menoro-noro montarima pompowee nahi pototono ka ipelengkuakono pesalaano songka.

²⁴ Pengkitano mia hinao ponto'orino te'aro a ponto'ori anu mentee, sine matano mia monge-monge menee-nee hawe i tompano tolino.

²⁵ Ana anu monge-monge mokomahakio aroano amano, ka mokomahakio aroano ineno.

²⁶ Nahi moiko mokonaakono denda mia mentee, montunduhi mia pinelangkai mbo'u nahi tekona.

²⁷ Mia anu monto'ori nahi hadio mpau, mia anu hinao ponto'orino me'ulu morini.

²⁸ Mia benge-benge mbo'u ta hinala pande mosongka tewala onae menoro-noro, ka hinala hinao ponto'orino tewala onae mekomu.