Powadi 16 - Wunta Mempori

¹ Mia polio montitimbanga i laro aroano, sine sangkino elo pu'uno inso ndi Ondae i Ue.

² Luwuno pesalaano mia morina montonda pongkitano onaeno, sine Ondaemo i Ue anu paresao aroa.

³ Peweengakonomo wineweumu ndi Ondae i Ue, asalakono gagi luwu sinongkamu.

⁴ Ondae i Ue weweuo luwuakoano singge hinao tinoono, maupo mia mosa'o gauno Doweweuo tiano oleo masolaa.

⁵ Sompo mia anu mompelangka-langkai mokoburu-Do i Ue; onae manasa nahi ta tola inso a mpohuku.

⁶ Saru pompehohawa ka petenunu, sala inampuni, hangano doitoako Ira i Ue mia olaiakono wineweu mosa'o.

⁷ Tewala Dopemoikoo i Ue pesalaano asa mia, maupo iwalino mia atuu Dopokosintuwuo saru onae.

⁸ Moikoopo hinawe tedei tinondaako menteea, sekonopo hinawe hadio nahina moleoa.

⁹ Aroano mia mompewowolo pesalaano, sine Ondaemo i Ue anu mokomanasao te'aroano pelempano.

¹⁰ Pomputusino anu pinesombai kongko a wiwino mokole, tempono mobitara, ngangano nahi poweweu sala.

¹¹ Pontimba ka ponsa'u anu mentee onaemo ndi Ondae i Ue, luwuno watu pontimba a laro ngkadu-kadu Ondae weweuo.

¹² Moweweu gau mosa'o mokoburuno mokole, hangano kadera poparentaa gagi moroso hangano menteea.

¹³ Wiwi anu mentee ipemoikoo mokole, ka mia anu mepau moleo ta pinehohawa.

¹⁴ Bamburuno mokole onaemo mala'eka matea, sine mia pande mosongka mokompenaa-naao.

¹⁵ A rupano mokole anu mewanta hinao tuwua ka moikono kana seruno usa tempo olono wula usa ka motu'i-tu'i.

¹⁶ Mohawe ponto'ori anu mentee moikoopo sekono wulaa, ka mohawe ponto'ori masuliopo olino sekono salaka.

¹⁷ Pesalaano mia moleo onaemo olaiakono wineweu mosa'o; isema dumagaio pesalaano, mekariao penaano.

¹⁸ Pompelangka-langkai mese'elungio tekale-kalea, ka konangi-nangi mese'elungio tedontaa.

¹⁹ Moikoopo me'urumako saru mia anu mauru sekonopo metia rinontu saru mia mompelangka-langkai.

²⁰ Isema mekokoongakono pau ta mohawe moikoa, ka me'uraomo mia anu me'ala-ala Ira i Ue.

²¹ Mia anu aroano pande mosongka pinau hinao ponto'orino, ka pepau anu mo'ahi ta lalu pine'ala-ala.

²² Pinewowolo molino onaemo pu'uno tuwuano anu me'ueo, sine hukuno mia benge-benge onaemo benge-bengeno.

²³ Aroano mia pande mosongka mokogagio ngangano hinao pinewowolo molino, ka weweuo wiwino lalu pine'ala-ala.

²⁴ Pau anu mompokosanaa kana inenano siu hoani, mo'ahino aroa ka mokomadoo ira wuku.

²⁵ Hinao pesalaa anu pinau moleo, sine tompano te'aro a matea.

²⁶ Pompemokoninggono asa mia anu mo'angga mokorosoo ka ipo'angga, hangano ngangano dumadaio.

²⁷ Mia anu nahi mentudu mongkeke aa mosa'oa, ka wiwino kana hinao api anu mompokomo'ai.

²⁸ Mia anu molengku moweweu pe'u'uaa, ka asa mia anu mompau nahi mentee momponsua sambe'e moroso.

²⁹ Mia anu mompake pobobarasai mompokotesaa pe'asa miano, ka weweuo onae melempa a mpesalaa anu nahi moiko.

³⁰ Isema mempiroakono matano, mosongka pompopo'oo; isema mekomu, moweweuomo anu mosa'o.

³¹ Wuu mopute onaemo ramba-ramba ulu anu tekosi, anu hinawe a nsala menteea.

³² Mia anu mauru lumaloio asa sorodadu, mia anu mokompeteao aroano lumaloio mia anu mompoko'ala kota.

³³ Undi tinende a wawo mpa'a, sine inso ndi Ondae i Ue luwuno pomputusi.