Powadi 15 - Wunta Mempori

¹ Sangki anu molusa-lusa mompokomorini tekuda, sine pau anu molea mompokotesingka tekuda.

² Elono mia pande mosongka moluarako ponto'ori anu momoiko, sine ngangano mia monge-monge mo'uwu benge-bengea.

³ Mata-Do i Ue kongko a luwuno po'ianga, kumitao mia moweweu mosa'o ka mia moweweu moiko.

⁴ Elo molusa onaemo keu tuwua, sine elo molengku mobelai aroa.

⁵ Mia benge-benge nahi tarimao pompaguruno amano, sine isema merioo pongkuahako onaemo pande mosongka.

⁶ A rahano mia mentee hadio arataa, sine hinaweno mia mosa'o gauno mowawa masolaa.

⁷ Wiwino mia pande mosongka morawo ponto'oria, sine aroano mia monge-monge komba kanatuu.

⁸ Pesombano mia mosa'o gauno mokoburu-Do i Ue, sine pekakaino mia moleo inehe-Do.

⁹ Pesalaano mia mosa'o gauno mokoburu-Do i Ue, sine isema mo'ungke menteea, Dopehohawao.

¹⁰ Pompaguru anu lansara monsikori mia anu bintao pesalaa, ka isema mo'o'aliaako pongkuahako ta mate.

¹¹ Tolinodo mia mate ka matea te'ungkahi i aro-Do i Ue, tamoako mbo'u aroano anano mia!

¹² Anu mompasinggiri nahi behe kinuahako; onae nahi behe lumako a mia pande mosongka.

¹³ Aroa anu mawongko weweuo rupa mewanta, sine mopoeno aroa mompokotetadi roso.

¹⁴ Aroano mia hinao ponto'orino mo'ungke ponto'ori, sine ngangano mia monge-monge mepui-puikaako benge-bengea.

¹⁵ Aroano mia mompemasusa mosa'o luwu, sine mia anu mawongko aroano wela mogawe.

¹⁶ Moikoopo tedei arataa tinondaako doitoako Ira i Ue sekonopo hadio arataa tinondaako salalaro.

¹⁷ Moikoopo asa sempe inahu saru pompehohawa sekonopo sapi mewalo saru po'o'aliaako.

¹⁸ Mara ntekuda mompokotesingka pengengea, sine mia anu sabara mokompenaa-naao pe'u'uaa.

¹⁹ Pesalaano anu moluwe kana wala merui, sine telaloano mia moleo merete.

²⁰ Ana anu pande mosongka mokomawongkoo amano, sine mia anu monge-monge mokongkuramao ineno.

²¹ Benge-bengea onaemo ineheno anu nahi molino pinewowolono, sine mia anu hinao ponto'orino melempa moleo.

²² Sinongka nahi gagi tewala nahina tepo'asaa pau, sine gagi tewala hadio anu mompatudu.

²³ Asa mia mo'unde hangano sangki anu ipoweeakono, ka tedoa moiko pau anu kona ntu'u a tempono!

²⁴ Sala ntuwuano mia molino pinewowolono me'aro i wawono, ka i'olaiakono tolinodo mia mate i totono.

²⁵ Rahano mia mompelangka-langkai Dopobangkuo i Ue, sine tida witano asa mia tuwu beine Dokorahakono.

²⁶ Sinongkano mia moweweu mosa'o mokoburu-Do i Ue, sine pau anu mauru atuu mempori.

²⁷ Isema modokoako me'uraa wongi-wongi, mokomarisuo somborino, sine isema umo'aliaakono pompowee nahi pototono ta tuwu.

²⁸ Aroano mia mentee montitimbanga sangkino, sine ngangano mia mosa'o gauno umuwu ira mongkona anu mosa'o.

²⁹ Ondae i Ue atuu olai inso a mia mosa'o gauno, sine pekakaino mia mentee Dorongeo.

³⁰ Mata anu mewanta mokomawongkoo aroa, ka lele anu moiko mokomorosoo wuku.

³¹ Mia anu mo'aroo birino a pongkuahako anu mompotuwu ta mo'ia i tonga-tongado mia pande mposongka.

³² Isema nahi perioo pompaguru tumadio koroino onaeno, sine isema rumongeo pongkuahako, mohawe pinewowolo molino.

³³ Doitoako Ira i Ue onaemo pompaguru anu mowawa ponto'ori anu mentee, ka pe'urumako mese'elungio pompelangkai.