Powadi 14 - Wunta Mempori

¹ Beine anu pande mosongka mompontade rahano, sine anu benge-benge rumongkaakono kaeno onaeno.

² Isema anu moleo pelempano, doitoako Ira i Ue, sine mia anu tesaa pesalaano mokongkodei Ira.

³ A ngangano mia benge-benge hinao lauro a pompelangka-langkai, sine mia pande mosongka ipekariao wiwino.

⁴ Tewala nahina sapi, dula mbo'u mooa, sine saru rosono sapi hadioomo hasilino.

⁵ Sakosii anu metenunu nahi pegaupi, sine isema mompuuri pegaupi, onaemo sakosii megaupi.

⁶ Anu mompasinggiri mo'ungke ponto'ori anu mentee, sine nahina tuduno, sekono a mia anu hinao ponto'orino, ponto'ori atuu moruana.

⁷ Olaiakonomo mia monge-monge, hangano nahi komohawe ponto'ori inso a wiwino.

⁸ Ponto'orino anu mentee mia pande onaemo mokonto'orio pesalaano onaeno, sine benge-bengeno mia monge-monge onaemo pompopo'oo.

⁹ Mia benge-benge pasinggirio pesomba pontolosi, sine mia moleo pada mopokitao moikoa.

¹⁰ Aroa tumo'orio pompemopoeno onaeno, ka mia susua nahi pokompetonda rumasao sanaano.

¹¹ Rahano mia mosa'o gauno ta ropu, sine kemano mia moleo ta tetiangi.

¹² Hinao pesalaa anu potaeno mia moleo, sine tompano me'aro a matea.

¹³ Maupo a laro mpengingisi aroa polio me'i'isei, ka po'undea polio metompaako a laro masusaa.

¹⁴ Mia anu aroano humapu Ira i Ue tendeako pesalaano, ka mia anu moiko saru hapa anu hina ndi onae.

¹⁵ Mia anu napi hina pinembasaino me'ala-alao sompo pinau, sine mia anu pande mekokoongakono pelempano.

¹⁶ Mia pande mosongka mompe'inandai ka olaiakono mosa'oa, sine mia monge-monge moweweu po'eheno aroano ka momperodo.

¹⁷ Isema ronga tesingka, moweweu nahi mentee, sine mia anu pande mosongka, sabara.

¹⁸ Mia anu napi hina pinembasaino mohawe benge-bengea, sine mia anu pande meramba-ramba uluako ponto'ori.

¹⁹ Mia moweweu mosa'o metuundu i arono mia moiko, mia mosa'o gauno a mpewowa langkaino mia mentee.

²⁰ Walino mbo'u mia mongkokolaro atuu umo'aliaakono, sine sambe'eno mia kaea atuu hadio.

²¹ Isema mompokokurama pe'asa miano moweweu hala, sine me'uraomo mia me'aroa a mia anu mongkokolaro.

²² Nahi tesaake mia anu mosongka wineweu mosa'o? Sine anu mosongka mongkona anu moiko mohawe pompehohawa ka petenunu.

²³ A laro sompo pe'isei hinao me'uraa, sine luwuno pau mpena butu mohaweako mongkokolaroa.

²⁴ Ramba-ramba uluno mia pande mosongka onaemo kaeano, ramba-ramba uluno mia monge-monge onaemo benge-bengeno.

²⁵ Sakosii anu metenunu mongkadudui tumuwu, sine isema mompuuri benge-bengea onaemo mompau nahi mentee.

²⁶ A laro doitoako Ira i Ue hinao pehondaa anu moroso, tendeano hinao pekadudui tiado luwuno ana-Do.

²⁷ Doitoako Ira i Ue onaemo pu'uno tuwua ranta ka itola mia inso a luwuno oho matea.

²⁸ A laro hadiono palili mo'ia marambano mokole, sine ba nahina palili tedontaomo anu moparenta.

²⁹ Mia anu sabara langkai ponto'orino, sine isema anu ronga tekuda mokolangkaio benge-bengeno.

³⁰ Aroa anu rodo mokomorosoo koroi, sine mosisiri mompokomoboo wuku.

³¹ Isema mompokonsii mia anu molema, mompokongkodei anu Mokogagio, sine isema me'aroa a mia mongkokolaro, umunde-unde Ira.

³² Mia mosa'o gauno pinobangku hangano mosa'o wineweuno, sine mia mentee mohawe pongkadudui hangano inso i aroano.

³³ Ponto'ori anu mentee mo'ia i laro aroano mia anu hinao ponto'orino, sine nahi tino'ori i laro aroano mia monge-monge.

³⁴ Menteea mokomantandeo pelangkaino tongku, sine hala mokoko'iiano tongku.

³⁵ Mokole memoikoo atano anu molino pinewowolono, sine tekudano umaluo mia anu moweweu mokoko'iia.