Powadi 13 - Wunta Mempori

¹ Ana anu pande mosongka merorongeakono pompaguruno amano, sine asa mia anu mompasinggiri nahi perorongeakono pongkuahako.

² Inso a wuano ngangano asa mia ta mongkaa moikoa, sine po'eheno aroano anu mompau nahi mentee mobobarasai.

³ Isema dumagaio ngangano, mekariao penaano, isema anu kowee-wee ngangano, ta umaluo matea.

⁴ Aroano mia moluwe bukeako ineheno, sine nahina tuduno, sekono aroano mia mokua pinoweeako hadio ntu'u.

⁵ Mia mentee o'aliaakono pegaupi, sine mia mosa'o gauno moweweu mosa'o ka mompokoko'ii.

⁶ Menteea dumagaio mia anu mempori pesalaano, sine gau mosa'o sumolangio mia tehala.

⁷ Hinao mia anu peleluno kana mia kaea, sine nahina hapa-hapano, hinao mbo'u anu mo'onde-onde mongkokolaro, sine arataano hadio.

⁸ Kaeaa onaemo tolosino penaano asa mia, sine mia mongkokolaro nahi ta moronge pompokodoito.

⁹ Mewineno mia mentee mewanta moiko ntu'u, sekono huluno mia mosa'o gauno mate.

¹⁰ Pompelangka-langkai butu moweweu pengengea, sine ondae anu mpomperorongeako patudu hinao ponto'ori anu mentee.

¹¹ Arataa anu moruana ihinawe ta makura, sine isema mopumpu ntededei ta weweuo tetiangi.

¹² Pinerorohi anu tepotulu mompokomasusa aroa, sine ino'aroa anu te'ihii onaemo keu tuwua.

¹³ Isema mompe'uru-uru pau, onae ta tumembio poko'ariano, sine isema tumondao parenta, ta montarima ponsulo.

¹⁴ Pompaguruno mia pande mosongka onaemo pu'uno tuwua, ranta ka itola mia inso a luwuno oho matea.

¹⁵ Pinewowolo molino anu moiko mowawa pompehohawa, sine pesalaado anu mpompau nahi mentee sumolangi ira.

¹⁶ Mia pande moweweuako ponto'ori, sine mia monge-monge mompopau benge-bengea.

¹⁷ Tinena anu mosa'o gauno modontai mia a laro masolaa, sine tinena anu metenunu mowawa tompaa.

¹⁸ Mongkokolaroa ka pasinggiri umaluo mia anu nahi perioo pompaguru, sine isema anu merioo pongkuahako, onae pinelangkai.

¹⁹ Ino'aroa anu pinokoweweu mompokosanaa aroa, molaiakono wineweu mosa'o mokoburuno mia monge-monge.

²⁰ Isema mebawaaako mia pande mosongka gagi pande mosongka, sine isema mewali-waliako mia monge-monge gagi urasa'o.

²¹ Mia tehala itondario masolaa, sine mia mentee sinuloako me'uraa.

²² Mia moiko mobinta pusaka tiado inuleno, sine kaeano mia tehala ninaa tiano mia mentee.

²³ Lereno mia mongkokolaro mehasiliako hadio kaanga, sine hinao anu tampula hangano nahina moleoa.

²⁴ Isema nahi pompake tuko, umo'aliaakono anano; sine isema mompehohawa anano, isepio a tempono.

²⁵ Mia mentee mongkaa hawe mowohi, sine kompono mia mosa'o gauno marasaiako makuraa.