Powadi 12 - Wunta Mempori

¹ Isema mongkekewoi pompaguru, mongkekewoi ponto'ori, sine isema umo'aliaakono pongkuahako, onae benge-benge.

² Mia moiko Dopemoikoo i Ue, sine anu mompopo'oo Dohukuo.

³ Mia nahi ta moroso mpiha hangano gau mosa'o, sine hakano mia mentee nahi ta telelu.

⁴ Beineno anu tekosi onaemo ramba-ramba uluno tamano, sine anu moweweu mokoko'iia onaemo kana haki anu mokomobooo wukuno tamano.

⁵ Sinongkano mia mentee onaemo moleoa, tinoono mia mosa'o gauno mompopo'oo.

⁶ Pauno mia mosa'o gauno montowoki rea, sine ngangano mia nahi pegaupi kumaduduio koroido.

⁷ Mia mosa'o gauno dinontai ranta nahi domehina mbo'u, sine rahano mia mentee mentade moroso.

⁸ Sompo mia inunde-unde menunu saru pinewowolono anu molino, sine mia anu nahi montaso pinewowolono, ta pinokongkodei.

⁹ Moikoopo gagi mia kodei, sine hinao atano, sekonopo melelu kana mia langkai potorono, sine makura kaanga.

¹⁰ Mia mentee merioo tuwudo pinotuwuno, sine pe'aroano mia mosa'o gauno atuu mobobarasai.

¹¹ Isema umanggao witano, ta mowohiako kaanga, sine isema mo'ungke anu nahina tuduno, nahi molino pinewowolono.

¹² Mia mosa'o gauno mosisiriakono buanino mia mosa'o wineweuno, sine hakano mia mentee mowawa hasili.

¹³ Mia mosa'o wineweuno kona ohoako halano wiwino, sine mia mentee mokompeluarako inso a masukaraa.

¹⁴ Sompo mia pinokomowohiako moikoa hangano wuano pau, ka mia mohawe ponsulo inso anu inanggano kaeno.

¹⁵ Pesalaano mia benge-benge moleo a mpotaeno onaeno, sine isema momperorongeako patudu, onae pande mosongka.

¹⁶ Benge-bengeomo anu mokomengkaao pe'o'oleno i tempo koa mbo'u atuu, sine pandeomo anu nahi perioo pasinggiri.

¹⁷ Isema mompau menteea, mokomengkaao anu moleo, sine sakosii megaupi mokomengkaao pompopo'oo.

¹⁸ Hinao mia anu me'ase kana petobono ponai, sine elono mia pande mosongka mowawa tompaa.

¹⁹ Wiwi anu mompau menteea kongko mpiha ranta nahina tampulaano, sine elo pegaupi butu tiano asa mpiniro.

²⁰ Pompopo'oo kongko i laro aroano mia anu mosongka mosa'oa, sine mia anu mompau pohaweno mesintuwu mohawe mawongkoa.

²¹ Mia mentee nahi ta umaluo masolaa hapamo koa, sine mia mosa'o gauno ta wela masola.

²² Mia anu megaupi wiwino mokoburu-Do i Ue, sine mia anu peleluno metenunu Dopehohawao.

²³ Mia pande wunio ponto'orino, sine aroano mia monge-monge mompau benge-bengea.

²⁴ Kaeno mia mokua mo'ini pabawa, sine moluwe gagino mo'angga dinadai.

²⁵ Danggara i laro aroa mokobungkulosuo mia, sine pau anu moiko mokomawongkoo.

²⁶ Mia mentee mohawe pompakambiano, sine pesalaano mia mosa'o gauno mokontesaa ira.

²⁷ Mia moluwe nahi ta morako pinete'umalano, sine mia mokua ta mohawe arataa anu masuli olino.

²⁸ A nsala menteea hinao tuwua, sine a nsalano anu humapuo pompe'ala-alano me'aro a matea.