Powadi 11 - Wunta Mempori

¹ Pontimba anu ahi mentee mokoburu-Do i Ue, sine Dopemoikoo watu pontimba anu koona ntu'u.

² Tewala hawe pompelangka-langkai, hawe mbo'u pasinggiri, sine ponto'ori anu mentee kongko a mia anu me'urumako.

³ Mia anu nahi pegaupi ipabawaio moleono aroano, sine anu mompau nahi mentee isolangio molengkuno.

⁴ A oleo tekudaa arataa nahi mentudu, sine menteea motolao mia inso a matea.

⁵ Pesalaano mia anu nahina tataano ipokomereteo menteeno, sine mia mosa'o gauno tedonta hangano gauno mosa'o.

⁶ Mia nahi pegaupi ipotolao menteeno, sine anu mompau nahi mentee kona rako hangano po'eheno aroano.

⁷ Pomperorohino mia mosa'o gauno nahi gagi a mateano, ka pomperorohino mia moweweu mosa'o gagi nahina tuduno.

⁸ Mia mentee pinotola inso a masukaraano, ka i'amba mia mosa'o gauno umeuo.

⁹ Saru ngangano mia mosa'o gauno mepateo pe'asa miano, sine mia mentee ikaduduio ponto'orino.

¹⁰ Tewala mia mentee moiko teweweuno, mo'undeomo kota, ka tewala mia mosa'o gauno mate, rurunduomo kokora-kora mawongko.

¹¹ Saru ronsono mia moleo, kota tewangu, sine saru ngangano mia mosa'o gauno, kota tekale-kale.

¹² Isema mompokongkodei pe'asa miano, nahi molino pinewowolono, sine mia anu pande, menoro-noro.

¹³ Isema mompalele pau nahi mentee, momposaba rahasia, sine isema anu metenunu, montutuwi kara-kara.

¹⁴ Nahina pontaate, tedontaomo tongku, sine hinao tekaduduia hangano hadio anu mompatudu.

¹⁵ Tedoa urasa'oomo mia anu gagi pe'iniano mia hawe, sine isema nahi tarimao gagi pe'inia, moikoomo ipo'ia.

¹⁶ Beine anu me'aroa mohawe pompelangkai, sekono anu mompokonsii mohawe kaeaa.

¹⁷ Mia anu mompehohawa moweweu moiko a ngkoroino onaeno, sine mia anu lambaha bobarasaio koroino onaeno.

¹⁸ Mia mosa'o gauno moweweu untu anu nahina tuduno, sine isema morawo menteea, mohawe sulono anu nahi bali.

¹⁹ Isema me'ini a menteea, te'aro a ntuwua, sine isema mo'ungke mosa'oa, te'aro a matea.

²⁰ Mia anu molengku aroano mokoburu-Do i Ue, sine mia anu nahina tataano, pesalaano Dopemoikoo.

²¹ Mia moweweu mosa'o manasa nahi ta tola inso a mpohuku, sine inuleno mia mentee ta kinadudui.

²² Kana tole-tole wulaa a ngusuno boe, kanatuumo beine tekosi anu nahina pontimbangano.

²³ Po'eheno mia mentee butu koa anu moiko, pomperorohino mia mosa'o gauno butu koa tekuda.

²⁴ Hinao anu ineheno mompowee, sine tetiangi kaea, hinao anu tedoa mo'uri, sine wela makura.

²⁵ Isema hadio ipompowee ronso, pinoweeako hadio ntu'u, isema mompopo'inu, onae ta pinopo'inu.

²⁶ Isema mompekaria gandu ira mentotonaao mia, sine ronso ta metii a wawo uluno mia anu mo'asa gandu.

²⁷ Isema mo'ungke moikoa, ira me'ineheakono mia, sine isema mo'ungke mosa'oa ta umaluo wineweu mosa'o.

²⁸ Isema merorohio kaeano ta tedonta; sine mia mentee ta tuwu kana lewe mongura.

²⁹ Isema kumale-kaleo somborino ta morako angi; mia benge-benge ta gagi atano mia pande mosongka.

³⁰ Wuano mia mentee onaemo keu tuwua, ka isema pande mosongka, mo'ala aroano mia.

³¹ Tewala mia mentee montarima ponsulo i wawo ntolino, tamoako mia mosa'o gauno ka mia tehala!