Powadi 10 - Wunta Mempori

Tepumpuano powadino i Salomo 10:1–22:16

¹ Luwuno powadino i Salomo. Ana anu pande mosongka mowawa mawongkoano amano, sine ana anu monge-monge mokomasusao ineno.

² Arataa inso a gau mosa'o nahi mentudu, sine menteea kumaduduio mia inso a matea.

³ Ondae i Ue nahi Dopo'ineeo mia mentee marasaiako mokoninggoa, sine po'eheno aroano mia mosa'o gauno nahi Dotarimao.

⁴ Kae anu mongguu weweu mongkokolaro, sine kaeno mia mokua mokogagio kaea.

⁵ Isema mopumpu i tempo motu'i-tu'i, onae ana anu molino pinewowolono; isema moturi i tempono konsowia, onae ana anu moweweu mokoko'iia.

⁶ Ronso kongko a wawo uluno mia mentee, sine ngangano mia mosa'o gauno mowuni pobobarasaia.

⁷ Rambeano mia mentee mowawa ronso, sine neeno mia mosa'o gauno gagi mosa'o.

⁸ Isema aroano pande mosongka, mompekokoongako parenta, sine isema benge-benge pepauno, ta tedonta.

⁹ Isema morina peleluno, moiko pelempano, sine isema melengku-lengkuako pesalaano, ta tino'ori.

¹⁰ Isema mempiroakono matano, mompokomasusa, isema benge-benge pepauno, ta tedonta.

¹¹ Ngangano mia mentee onaemo insoano tuwua, sine ngangano mia mosa'o gauno mowuni pobobarasaia.

¹² Po'o'aliaako mompokohina pengengea, sine pompehohawa tumutuwio luwuno polimpaia.

¹³ A wiwino mia hinao ponto'orino hinawe ponto'ori anu mentee, sine pontunduhi tepatinda tiano torukuno mia anu nahi molino pinewowolono.

¹⁴ Mia pande mosongka monaa ponto'ori, sine ngangano mia benge-benge moko'umpedao matea.

¹⁵ Arataano mia kaea onaemo kotano anu moroso, sine mateano mia marasai tuwuno onaemo mongkokolarono.

¹⁶ Tambono mia mentee wawao a ntuwua, pohaweano mia mosa'o gauno wawao a hala.

¹⁷ Isema merioo pompaguru, melempa te'aro a ntuwua, sine isema nahi perioo pekuahako, onae tesaa.

¹⁸ Isema mowuni po'o'aliaako, pegaupi wiwino; isema mompau anu nahi mentee, onaemo mia monge-monge.

¹⁹ I larono hadio pau manasa hinao polimpaia, sine isema anu umontoo wiwino, onae molino pinewowolono.

²⁰ Elono mia mentee kana salaka bininiki, sine pinewowolono mia mosa'o gauno tedei tuduno.

²¹ Wiwino mia mentee mompakambi hadio mia, sine mia benge-benge mate hangano nahi pompewowolo molino.

²² Poronso-Domo i Ue anu mompokogagi kaea, pe'isei nahi ta tumiangio.

²³ Ineheno mia monge-monge onaemo moweweu songka molengku, ba kana'umpe ipoweweu ponto'ori anu mentee tiano mia anu hinao ponto'orino.

²⁴ Hapa anu mokodoitoo mia mosa'o gauno, onaemo anu ta umaluo, sine po'eheno mia mentee ta ininduako.

²⁵ Tewala angi mokora me'alu, tampulaomo mia mosa'o gauno, sine mia mentee hinao pe'empehino anu nahina tampulaano.

²⁶ Kana olo a ngisi ka ahu a mata, kanatuumo anu moluwe a mia anu tumenao.

²⁷ Doitoako Ira i Ue mompokomelai tinuwu, sine luwuno ta'uno mia mosa'o gauno pinoko'owowa.

²⁸ Pomperorohino mia mentee ta metompaako mawongkoa, sine pomperorohino mia mosa'o gauno gagi nahina tuduno.

²⁹ Pesalaa-Do i Ue onaemo pekaduduido mia moleo, sine mateano mia anu moweweu mosa'o.

³⁰ Mia mentee nahi kolonto-lonto ngkoraane-ngkoramai anu nahina tampulaano, sine mia mosa'o gauno nahi ta mo'iangario wita.

³¹ Ngangano mia mentee moluarako ponto'ori anu mentee, sine elo mesampa ta sinesei.

³² Wiwino mia mentee tumo'orio mongkona anu mompokosanaa, sine ngangano mia mosa'o gauno mompopo'oo.