Po'unde-unde 99 - Wunta Mempori

Ondae i Ue , Mokole anu mempori 99:1-9

¹ Ondaemo i Ue Mokole, po'ineeomo ka dompondidi-ndidi luwuno tongku. Ondae mo'ia i wawono kerubi, po'ineeomo ka itelelu tolino.

² Ondae i Ue tedoa langkai pabawa-Do i Sioni, Ondae mantande i wawono luwuno tongku.

³ Po'ineeomo dome'unde-undeo nee-Miu anu langkai ka mongkokongiri; Ondaemo anu mempori!

⁴ Omiu Mokole anu moroso, anu mongkekewoi songka, Omiumo anu kumorahakono menteea; songka ka moleoa i olodo inuleno i Yako, Omiumo anu weweuo.

⁵ Pelangkai Iramo i Ue, Ue Alato, penggolontuumo pesomba a mpelandaano karu-Do! Ondaemo anu mempori!

⁶ I Musa ka i Haruni tewinso sando mpesomba-Do, ka i Semueli tewinso mia anu mebooliakono nee-Do. Mpebooli ira ndi Ondae i Ue ka Dosangki ira.

⁷ Inso a laro nseru-Do Ue Ala Dopepau ndi ondae; ondae mpe'ini iramo a potantui-Do ka pompakosi anu Doweeako ira.

⁸ Omiu Ue, Ue Alamami, Isangki kamimo, Omiumo Ue Ala anu umampuni ira, sine anu mbo'u mombalo a wineweudo.

⁹ Pelangkai Iramo i Ue, Ue Alato, ka penggolontuumo pesomba a ntorukuno-Do anu mempori! Hangano Ondae i Ue, Ue Alato, mempori!