Po'unde-unde 97 - Wunta Mempori

Ondae i Ue gagi Mokole 97:1-12

¹ Ondaemo i Ue Mokole! Po'ineeomo tolino ka ikokora-kora, po'ineeomo domemawongko luwuno togo!

² Seru ka wongi-wongi lumimbu Ira, moleoa ka songka onaemo empehino kadera poparentaa-Do.

³ Api melele i aro-Do, ka mokomo'ai ira iwali anu lumimbu Ira.

⁴ Luwuno koliki-Do wantahio tolino, mondidi-ndidi tolino kumitao.

⁵ Luwuno torukuno tepe'awu kana gomo i aro-Do, i aro-Do Ueno asa wawontolino.

⁶ Langi paleleo moleo-Do, luwuno tongku kumitao maramba-Do.

⁷ Luwuno mia anu mesomba a ntinaha ta mohawe mokoko'ii, kanatuu koa mbo'u anu mompelangka-langkaiako luwuno lahumoa; luwuno pinesombai mpenggolontu mpesomba ndi Ondae.

⁸ Irongeo Sioni ka mawongko, luwuno ana beineno Yehuda mengkokora-kora mpopemaroa, hangano pobitara-Miu, oo Ue.

⁹ Hangano Omiumo, oo Ue, Anu Tedoa Mantande i asa wawontolino, lalua Komiupo maramba sekonopo luwuno pinesombai.

¹⁰ Hei mia anu mehohawa Ira i Ue, o'aliaakonomo anu mosa'o! Ondae, anu mekariao penaano mia anu pinehohawa-Do, ta motola ira inso a ngkaeno mia mosa'o gauno.

¹¹ Mewine mesabakoomo tiano mia mentee, ka mawongkoa tiano mia anu bobotoli aroano.

¹² Mawongkomo hangano Ondae i Ue, hei luwuno mia mentee, ka unde-undeomo nee-Do anu mempori.