Po'unde-unde 96 - Wunta Mempori

Ondae Ue Ala, Ue ka Puu Mpobitarano asa wawontolino

¹ Penaniakonomo penani wo'ohu tia-Do i Ue, penanimo tia-Do i Ue, hei asa wawontolino!

² Penanimo tia-Do i Ue, unde-undeomo nee-Do, paleleomo tekaduduia inso ndi Ondae sompo-sompo oleo.

³ Tutuluomo maramba-Do i olodo tongku ka luwuno wineweu-Do anu kinohali-haliako i olodo luwuno suku tongku.

⁴ Hangano Ondae i Ue tedoa langkai ka tedoa inunde-unde, mongkokongiri Irapo sekono luwuno pinesombai.

⁵ Hangano luwuno pinesombaido tongku butu lahumoa nahina pengkonaano, sine Ondaemo i Ue anu mokogagio langi.

⁶ Pompelangkai ka marambaa kongko i aro-Do, roso ka ponangia kongko a mpo'ianga mempori-Do.

⁷ Weeako Iramo i Ue, hei luwuno suku tongku, weeako Iramo i Ue marambaa ka roso!

⁸ Weeako Iramo i Ue marambano nee-Do, wawaomo pesomba ka pewinsomo a kintala-Do!

⁹ Penggolontuumo pesomba ndi Ondae i Ue saru marambano memporia, pondidi-ndidimo i aro-Do, hei asa wawontolino!

¹⁰ Pepaumo i olodo luwuno tongku, ”Ondaemo i Ue Mokole! Mentee ntu'u, tolino mentade, nahi ta telelu. Ira bitarao luwuno tongku a laro menteea.”

¹¹ Po'ineeomo langi mawongko ka tolino kokora-kora, po'ineeomo tahi saru ihino umu'uru,

¹² po'ineeomo pada ka luwuno anu mpo'ia i larono memawongko, oo, po'ineeomo luwuno keu a ntobu mengkokora-kora mpo'unde

¹³ i aroDo i Ue, hangano hawe Ira, hangano Ondae hawe Ira bitarao tolino. Ira bitarao wawontolino a laro menteea, ka luwuno tongku a laro menteea-Do.