Po'unde-unde 95 - Wunta Mempori

Pepopoto'ori a bawaa pinakambi-Do i Ue 95:1-11

¹ Aiwamo tomengkokora-kora mawongkoako Ira i Ue, mengkokora-koraakono torukuno watu tekaduduiato.

² Aiwamo tompe'aro ndi Ondae saru penani pontarimakasi, kokora-koraako Ira saru penani po'unde-unde.

³ Hangano Ondae i Ue onaemo Ue Ala anu langkai, Mokole anu langkai i wawono luwuno pinesombai.

⁴ Luwuno ondaloano tolino kongko a ngkae-Do, punsuno luwuno torukuno mbo'u Ondae me'ueo.

⁵ Tahi Ondae me'ueo, Ondaemo anu mokogagio, ka wita motu'i, kae-Do koa anu weweuo.

⁶ Pewinsomo, aiwamo tompenggolontu mpesomba, mpenggolontu i aro-Do i Ue anu mokogagi kita.

⁷ Hangano Ondaemo Ue Alato, ka ontaemo bawaa pinakambi-Do, bawaano bimba tinaateno kae-Do. A oleo andio, tewala mansa imerongeo suara-Do!

⁸ Si mpokomonteao aroamiu kana i Meriba, kana tempono i Masa i pada one,

⁹ i tempono dome'ara-arahako Aku uempu'umiu, me'arahako Aku, kahinaano domengkitao wineweu-Ku.

¹⁰ Pato pulu nta'u Kumokoburuakono inule asa api atuu, onaemo ka Kupepau, ”Ondae bawaa anu ntesosaelo aroado, nahi domento'orio pesalaa-Ku.”

¹¹ Onaemo pu'uno, ka Kupesumpa a laro ntekuda-Ku, ”Nahi ira hori mpewinso a wita penaa-naaa-Ku.”