Po'unde-unde 94 - Wunta Mempori

Ondae i Ue Puu Mpobitara anu moleo

¹ Oo Ue Ala anu mombalo, oo Ue, oo Ue Ala anu mombalo, Ipepopokitamo!

² Ipewangumo, oo Puu Mpobitarano tolino, Ipombalomo wineweuno mia mompelangka-langkai!

³ Opia mbo'u tehineno mia mosa'o gauno, oo Ue, opia mbo'u tehineno mia mosa'o gauno ipesana-sanaa?

⁴ Ondae mpoluarako luwuno pau anu mosa'o, luwuno mia anu mpoweweu mosa'o mpompelangka-langkai.

⁵ Bawaa-Miu, oo Ue, domempirego ira, mia-Miu isa'a dompokonsiio;

⁶ tuwu beine ka mia hawe domensumbeleo, nana'ote nahina amado dompepate ira;

⁷ ka dompotae, ”Nahi Dokitao i Ue, Ondae Ue Alano i Yako nahi Doperioo.”

⁸ Pekokoongakono, hei omiu anu lalu benge-benge i olodo palili! Hei luwuno mia monge-monge, te'ipiake ka igagi mempande mposongka?

⁹ Ondae anu pasao biri, nde kana'umpe nahi Ira rumongeo? Ondae anu weweuo mata, nde kana'umpe nahi Ira kumitao?

¹⁰ Ondae anu paguru ira tongku, nde kana'umpe nahi Ira mohuku? Ondae anu paguruako ira mia ponto'ori.

¹¹ Ondae i Ue tumo'orio luwuno sinongkano mia; menteeano luwuno nahina tuduno.

¹² Me'uraomo mia anu pinaguru-Miu, oo Ue, ka anu Ipaguruakono Songka-Miu.

¹³ Komiu mokorodoo a luwuno oleo masolaa, hawe ka ikineke aa tiano mia mosa'o gauno.

¹⁴ Hangano Ondae i Ue nahi Ira mebungkuio bawaa-Do, mia-Do isa'a nahi Ira bintao;

¹⁵ Mentee ntu'u, songka ta wali moroso menunu saru moleoa, luwuno mia anu bobotoli aroano ta tumondao.

¹⁶ Isemake anu ta mentade umala-alaakune i arodo mia melambaha, isemake anu ta aiwa mokowali aku i arodo anu mpoweweu mosa'o?

¹⁷ Tewala komba Ondae i Ue anu tumulungi aku, ilawu kupo'ia a mpo'ianga boni-boni.

¹⁸ Mansaku mewowoloo, ”Karuku nami moroso,” pompehohawa-Miu, oo Ue, mokoroso aku.

¹⁹ Tempono laro aroaku tesawuregoako luwuno pinewowolo, pontarero-Miu mokonsanaao sumangaku.

²⁰ Nde kana'umpe ka Ipedandi tepo'asa mpobitaraa anu mosa'o, anu mowawa masolaa me'empehiako atora?

²¹ Ondae mpedandi tepo'asa mpoweweu mosa'o umewaio mia mentee, ka mehuku mateo mia nahina salano.

²² Sine Ondae i Ue onaemo kota benteku, Ue Alaku torukuno watu pepekaduduiaku.

²³ Ira mombalo a mpoweweudo anu mosa'o, ka hangano poweweudo anu mosa'o Ira mepate ira; Ondae i Ue, Ue Alato, Ira mepate ira.