Po'unde-unde 92 - Wunta Mempori

Ondae i Ue mokomantandeo mia mentee 92:1-16

¹ Penani po'unde-unde. Penani tiano oleo Saba.

² Moiko ntu'u montarimakasi ndi Ondae i Ue, ka menani umunde-undeo nee-Miu, Omiu Anu Tedoa Mantande.

³ Ka ipinalele pompehohawa-Miu i tempono mo'oru ka mentee-Miu i tempono wongi,

⁴ saru kulele hopulu talino ka saru gambusu, saru tinondaako katapi.

⁵ Hangano Ipokomawongkoakunemo inangga-Miu, oo Ue, hangano wineweuno kae-Miu aku kokora-kora mo'unde.

⁶ Langkai ntu'u luwuno inangga-Miu, oo Ue, ka tedoa ondalo luwuno sinongka-Miu.

⁷ Mia benge-benge nahi ta mokonto'orio, ka mia monge-monge nahi ta mokonto'orio mongkona atuu.

⁸ Maupo mosa'o gauno mentumba kana ewo, ka mia anu moweweu mosa'o ntetiangi, ira merinopu ranta nahina tampulaano.

⁹ Sine Omiumo anu lalu mantande ranta nahina tampulaano, oo Ue!

¹⁰ Hangano, menteeano iwali-Miu, oo Ue, hangano, menteeano iwali-Miu ira memate, luwuno mia anu mpoweweu mosa'o ira mensiniarawo.

¹¹ Sine Itiangio rosoku kana tanduno bante, ongkue inurapiako lana wo'ohu;

¹² mataku me'uru-uruo iwaliku, biriku rumongeo mongkona mia lambaha anu mentade umewai aku.

¹³ Mia mentee ta mentumba kana keu kuruma, ta tuwu mewalo kana keu arasi i Libano;

¹⁴ ondae anu mempinaho a Raha-Do i Ue ira mentumba a kintala-Do Ue Alato.

¹⁵ Maupo tempono mota'u da mpewua ira, madoo mpiha ka moroso,

¹⁶ ka ipinalele, nine Ondae i Ue atuu mentee, Ondaemo torukuno watuku ka nahina molengkua ndi Ondae.