Po'unde-unde 91 - Wunta Mempori

A laro pongkadudui-Do Anu Tedoa Mantande 91:1-16

¹ Mia anu mentoro a laro pongkadudui-Do Anu Tedoa Mantande ta merato a laro po'engoi-Do Anu Tedoa Pabawa.

² Onae ta mepau ndi Ondae i Ue: Pepekaduduiaku ka bente pekorahakoaku, Ue Alaku, anu pine'ala-alaku.

³ Mentee ntu'u, Ondaemo anu Ira motolako inso a ohono puu mporako manu-manu, inso a haki lele anu mompepate.

⁴ Saru pani-Do Ira borungiko, a ntoto pani-Do komepekadudui, petenunu-Do gagi kanta ka potempu.

⁵ Siimo udoitoakono mongkokongirino wongi, a mpana anu mpenee-nee i tempono meene,

⁶ a haki lele anu mepinsolako a laro wongi-wongi, a haki mesaki anu me'a'e ntonga oleo.

⁷ Maupo asa nsowu mia tebangku i horimu, ka hopulu nsowu i koanamu, masolaa atuu nahi ta umaluko.

⁸ Omue butu sumakosiiakono matamu ka kumitao pombaloa a mia mosa'o gauno.

⁹ Hangano Ondae i Ue upokogagiomo pepekaduduiamu, Anu Tedoa Mantande uweweuo Iramo pe'engoamu,

¹⁰ masolaa nahi ta umaluko, ka pohuku nahi ta umpedaakono kemamu;

¹¹ hangano Ira parentao luwuno mala'eka-Do ndi omue, ka domedagaiko a luwuno pesalaamu.

¹² Ira menseneko a wawo ngkaedo, kasi tetidu karumu a watu.

¹³ Singa ka ule mo'ito kolumandao, anano singa ka ule naga kolumolandao.

¹⁴ ”Hangano aroano metako ndi Ongkue, onaemo pu'uno Aku motolao, Aku rumereio, hangano ito'orio nee-Ku.

¹⁵ Tewala onae mebooli ndi Ongkue, Aku sumangki, Aku kumongkomio a laro ma'isoa, Aku motolao ka moweeakono pompelangkai.

¹⁶ Saru tinuwu melai Aku mokomowohiakono, ka Aku mopokitao ndi onae tekadudui inso ndi Ongkue.”