Po'unde-unde 90 - Wunta Mempori

TIANO IV: 90–106 Ondae i Ue, pepekaduduia nahina tampulaano

¹ Pekakaino i Musa, tetenaa-Do Ue Ala. Ue, Omiumo pepekaduduiamami mapa'api-api inule.

² Se'eluno luwuno torukuno pine'anaako, tolino ka wawontolino pine'anaako, inso i ndi'ipua hawe nahina tampulaano Omiumo Ue Ala.

³ Omiu mokuleo mia a pampawu, ka mepau, ”Pekulemo, hei luwuno anano mia!”

⁴ Hangano a mata-Miu asa nsowu ta'u mengkena kana oleo indiawi anu telaloomo, ke kana aasa pepo'eua daga i tempono wongi.

⁵ Omiu mokorodoo mia a laro mpoturino, tempono mo'oru kana ira ewo anu ta mate,

⁶ i tempono mo'oru mentumba ka tuwu, i tempono ngkiniwia tengkuru ka moleu.

⁷ Mentee ntu'u, pingko rosomami hangano tekuda-Miu, ka hangano mokulano tekuda-Miu omami gagi medoito.

⁸ Salamami Inaao i aro-Miu, tendeano maupo anu tewuni a laro wantano rupa-Miu.

⁹ Mentee ntu'u, luwuno oleomami telalo hangano bamburu-Miu, kimempingkoo luwuno ta'umami kana mekohe.

¹⁰ Tempomami mentuwu pitu pulu nta'u, tewala memoroso kami, halu pulu nta'u, ka pino'undeakono butu koa masukaraa ka marasaia; oo, magasi ntu'u kimetampula.

¹¹ Isemake tumo'orio rosono tekuda-Miu ka mokonto'orio bamburu-Miu ranta ka idoitoa-Komiu?

¹² Ipaguru kamimo dumoao luwuno oleomami, ka kimpohawe aroa anu pande mosongka.

¹³ Ipepokulemo, oo Ue! Opia mbo'u tehineno? Ipehohawa iramo tetenaa-Miu!

¹⁴ I tempono mo'oru Ipokomowohiakamimo pompehohawa-Miu, ka kimengkokora-kora mpo'unde ka memawongko asa ntinuwumami.

¹⁵ Iweweu kamimo memawongko menunu saru luwuno oleo Ipokonsii kami, menunu saru luwuno ta'u kimpembasaio marasai.

¹⁶ Po'ineeomo wineweu-Miu tengkita a luwuno tetenaa-Miu, ka maramba-Miu a luwuno anado.

¹⁷ Po'ineeomo pe'aroa-Do i Ue, Ue Alamami, metii ndi omami, ka Ipokorosoomo wineweuno kaemami, oo, pokomorosoomo wineweuno kaemami!