Po'unde-unde 9 - Wunta Mempori

Ondae Ue Ala, puu pongkaduduido mia moleo 9:1–10:18

¹ Tiano petewawado anu mpenani. Montonda unino penani Muti-Labeni. Penani po'unde-undeno i Daudi.

² Aku umunde-unde Ira i Ue tompaano aroaku, aku popauo luwuno wineweu-Miu anu kinohali-haliako;

³ aku mo'unde ka mawongko hangano Omiu, menani umunde-undeo nee-Miu, oo Anu Tedoa Mantande,

⁴ tempono luwuno iwaliku mposuka, ondae ntetidu ntedonta ka memate i aro-Miu.

⁵ Hangano Omiu umalaakono kara-karaku ka tiaku, Omiu mentoro a wawo ngkadera poparentaa gagi puu mpobitara anu moleo.

⁶ Luwuno tongku Itekudaako iramo, mepate iramo luwuno mia mosa'o gauno; needo Ipahihiomo mpiha ka nahina tampulaano;

⁷ iwali pingko iramo memate, wela gagi howuno anu terawo: luwuno kota Ibuta iramo; tampula rambeado.

⁸ Sine Ondae i Ue mentoro moparenta ranta nahina tampulaano, kadera poparentaa-Do Dopontadeo ka Dopolempao pobitaraa.

⁹ Ondaemo anu bitarao wawontolino a moleoa ka bitarao luwuno tongku a menteea.

¹⁰ Kanatuumo Ondae i Ue onaemo pepekaduduiado mia anu melinanda, pepekaduduia i tempono ma'isoa.

¹¹ Kanatuumo anu tumo'orio nee-Miu me'ala-ala Komiu, hangano Omiu nahi bintao mia anu umungke Komiu, oo Ue.

¹² Penanimo unde-unde Ira i Ue, anu mo'ia i Sioni, paleleomo wineweu-Do i olodo luwuno tongku,

¹³ hangano Ondae anu tumuntuo reano mia anu tepokonsii; peboolido nahi Dokolupeo.

¹⁴ Ipehohawa akumo, oo Ue; kitaomo tedoa marasaino ongkue, hangano anu me'o'aliaakune, oo Omiu, anu tumande aku inso a mpewowa langkaino matea,

¹⁵ ka kupopauo luwuno wineweu-Miu anu inunde-unde ka meboo-booli hangano tekaduduia inso ndi Omiu a mpewowa langkaino ana beine Sioni.

¹⁶ Luwuno tongku saampu a laro aa anu wineweudo, karudo kona rako a laro buani anu pinasado ondaedo.

¹⁷ Ondae i Ue mepopoto'ori Iramo, Ondae weweuo moleoa; mia mosa'o gauno kona oho a laro wineweuno kaeno onaeno. Sela

¹⁸ Luwuno mia mosa'o gauno ira mpekule a ntolinodo mia mate, oo, luwuno tongku anu kumolupe Ira Ue Ala.

¹⁹ Hangano komba ta kinolupe mpiha mia mongkokolaro, komba ta tampula mpiha pomperorohiano mia marasai.

²⁰ Ipentademo, Ue, ka si po'inee ira mia mponangi; po'ineeomo luwuno tongku mebinitara i aro-Miu!

²¹ Weweu iramo mpondidi-ndidi, oo Ue, po'ineeomo luwuno tongku me'akuio nine ondae mia koa. Sela