Po'unde-unde 89 - Wunta Mempori

Isuake pompehohawa-Do i Ue anu nahi bali ndi Daudi? 89:1-53

¹ Penani pompaguruno i Etani, to Eserahi.

² Aku menaniako mpiha luwuno pompehohawa-Do i Ue anu nahi bali, mopoto'oriakono ngangaku petenunu-Miu mapa'api-api inule.

³ Menteeano kupotae: Pompehohawa-Miu anu nahi bali winangu ranta nahina tampulaano; petenunu-Miu nahi telelu kana langi.

⁴ ”Kuwutuomo pedandia saru mia bininiki-Ku, mesumpa Akumo ndi Daudi, tetenaa-Ku:

⁵ Ranta nahina tampulaano Aku tumeahakono inulemu, ka mokorosoo kadera poparentaamu mapa'api-api inule.” Sela

⁶ Po'ineeomo langi ka ipaleleo luwuno pabawa-Miu, oo Ue, ka petenunu-Miu a laro tepumpuado anu mempori.

⁷ Nde isemake a laro nseru anu mengkena saru Ondae i Ue, anu mengkena kana Ondae i Ue i olono luwuno pinesombai?

⁸ Ondae Ue Ala atuu mongkokongiri i olodo anu mempori, maramba ka mongkokodoito lumaloio luwuno anu kongko a mpehori-hori-Do.

⁹ Oo Ue, Ue Alano luwuakoano, isemake anu moroso kana Omiu, oo Ue? Petenunu-Miu kongko a mpehori-hori-Miu.

¹⁰ Omiumo anu parentao pebundeno tahi anu tedoa mompelangka-langkai, tempono dopewuatako bombano, Omiu koa mbo'u anu mokotemontoo.

¹¹ Omiumo anu piregoo i Rahabi kana mia anu monsumbele, saru kae-Miu anu moroso sumiarawoo iwali-Miu.

¹² Omiu koa me'ueo langi, Omiu koa mbo'u me'ueo tolino, wawontolino saru ihino Omiu koa mokogagio.

¹³ Utara ka selata, Omiu koa anu mokogagio. Tabori ka Heremoni kokora-kora mo'unde hangano Omiu.

¹⁴ Omiu koa me'ueo tokia anu moroso, kae-Miu moroso ka kae ngkoana-Miu tetande mantande.

¹⁵ Moleoa ka songka onaemo pentadeano kadera poparentaa-Miu, pompehohawa ka petenunu melempa i aro-Miu.

¹⁶ Me'uraomo tongku anu monto'ori kokora-kora mo'unde, oo Ue, ondae mentuwu a laro wantano rupa-Miu;

¹⁷ hangano nee-Miu ondae mengkokora-kora hawe sumoo oleo, ka hangano moleo-Miu mpo'unde ira.

¹⁸ Hangano Omiu koa marambano rosodo, ka hangano Ipemoikoo Itiangio tanduno rosomami.

¹⁹ Hangano kantato Ondae i Ue me'ueo, ka mokoleto Anu Tedoa Mempori me'ueo, Ue Alado to Isaraeli.

²⁰ Hori Komiu mepau a laro pongkita a luwuno mia anu pinehohawa-Miu. Omiu mepau, ”Kutulungiomo asa mia pongkiari, mokomantandeomo asa mia bininiki inso i olodo tongku atuu.

²¹ Kuhaweomo i Daudi, tetenaa-Ku; Ku'urapiakonomo lana-Ku anu mempori,

²² ka kae-Ku kukongkomio mpiha, tendeano tokia-Ku mokorosoo.

²³ Nahi ira menangio iwali, ka nahi ta mokonsiio mia lambaha.

²⁴ Aku rumawo-rawo ira iwalino inso i arono, ka ondae anu me'o'aliaakono Aku mepate ira.

²⁵ Mentee-Ku ka pompehohawa-Ku anu nahi bali kumongkomio, ka hangano nee-Ku tandu rosono ta tetiangi.

²⁶ Aku weweuo kaeno pabawaio tahi, ka kae ngkoanano pabawai ira korono.

²⁷ Onae ta moboi Aku, ’Omiumo Amaku, Ue Alaku, torukuno watu tekaduduiku.’

²⁸ Aku tumandeo mbo'u gagi ana aka, gagi anu tedoa mantande i olodo luwuno mokole ntolino.

²⁹ Onae Aku koa mehohawao mpiha ranta nahina tampulaano, ka pedandia-Ku moroso ndi onae.

³⁰ Aku tumeahakono inuleno anu moparenta ranta nahina tampulaano, ka kadera poparentaano asa ntinuwuno langi.

³¹ Tewala inuleno mebintao Songka-Ku ka nahi domentuwu montonda songka-Ku,

³² tewala nahi domentondao pompakosi-Ku ka nahi dompe'ini a luwuno parenta-Ku,

³³ asalakono pe'ewado Aku humukuakono tuko ka tumunduhi ira hangano salado.

³⁴ Sine Aku koa mehohawao mpiha ka petenunuKu nahi Aku balio.

³⁵ Nahi Aku lumimpaio pedandia-Ku, ka pinauno wiwi-Ku nahi Aku balio.

³⁶ Pohona Kupesumpa a mempori-Ku, manasa nahi Aku megaupi ndi Daudi:

³⁷ Inuleno anu moparenta ta kongko ranta nahina tampulaano, ka kadera poparentaano ta moroso kana mata'oleo i aro-Ku,

³⁸ moroso nahina tampulaano kana wula, sakosii nahi bali a laro nseru.” Sela

³⁹ Sine Omiu isa'a nahi tarimao ka tumadio, gagi bamburu a mia anu inurapi-Miu,

⁴⁰ balio pedandia saru tetenaa-Miu, kumokoburutio ranba-ramba uluno a laro pampawu,

⁴¹ umaluo luwuno pekorahakoano, weweuo luwuno benteno gagi howuno anu terawo.

⁴² Luwuno mia anu telalo a nsala merontuo, ka onae gagi tataado pehori rahano.

⁴³ Iweweuomo kae ngkoanado iwalino monangi, Iweweuomo luwuno iwalino memawongko.

⁴⁴ Mata mponaino mbo'u Iwolilio ndi onae, ka nahi Ipokowalio a laro mpe'iwalia.

⁴⁵ Itompaakonomo pabawano anu maramba, ka kadera poparentaano Ipepasiakono a wita.

⁴⁶ Ipoko'owowao tuwu mongurano, Itutuwiakono mokoko'ii. Sela

⁴⁷ Opia mbo'u tehineno, oo Ue, Ipewuni mpiha, tekuda-Miu kolanga-langa kana api?

⁴⁸ Irambeomo kana hapa tinuwuku andio, nahina ntu'u tuduno Ipokogagio luwuno anano mia!

⁴⁹ Isemake anu polio tuwu mpiha ka nahi pembasaio matea, anu polio motolao penaano inso a mpabawano tolinodo mia mate? Sela

⁵⁰ Isuake tondonino pompehohawa-Miu anu amba-ambano, oo Ue, anu Idandiakonomo sumpa ndi Daudi a mpetenunu-Miu?

⁵¹ Irambeomo, oo Ue, pontata a luwuno tetenaa-Miu, anu tinembiku a laro radaku inso a luwuno tongku.

⁵² Luwuno iwali-Miu mpotata, oo Ue, mentatao pelempano mia anu inurapi-Miu.

⁵³ Inunde-unde Iramo i Ue ranta nahina tampulaano! Ami, ami.