Po'unde-unde 88 - Wunta Mempori

Pompemasusano mia anu inaluno tekuda-Do i Ue 88:1-19

¹ Penani. Penani po'unde-undeno inuleno i Kora. Tiano petewawa mpenani. Montonda nanino Mahalati Leanoti. Penani pompaguruno i Hemani, to Eserahi.

² Oo Ue, Ue Ala anu kumadudui aku, meene mebooli aku, i tempono wongi da kongko aku i aro-Miu.

³ Po'ineeomo pekakaiku ka ihawe i aro-Miu, Ipo'aroomo biri-Miu a mpebooliku;

⁴ hangano kute'osaakono urasa'o, ka tumuwuku umpedaomo a ntolinodo mia mate.

⁵ Tinudu aku kana mia anu metii a laro ngkekeno kaburu; kana tama anu nahina rosono.

⁶ Tinadi aku i olodo mia mate, kana mia anu mempinepate, tepombole a laro ngkaburu. Nahi rambe ira mbo'u, ondae nte'otuhi inso a mpabawa-Miu.

⁷ Inaa akumo a laro ngkekeno kaburu anu lalu i totono, a ondaloano anu wongi-wongi.

⁸ Tedanso aku hangano mokulano tekuda-Miu, ka luwuno pebundeno bomba-Miu dumunsi aku. Sela

⁹ Ipoko'olaiomo tepoto'oriku inso ndi ongkue, Iweweu akumo gagi mokoburudo. Te'uko aku ka nahi kupokompeluarako;

¹⁰ mataku mo'o'au hangano marasai. Hawe sumoo oleo kupebooli ndi Omiu, oo Ue, ka padindio kaeku ndi Omiu.

¹¹ Nde Iweweuoke anu kinohali-haliako a mia mate? Kana'umpe onitu ta gagi mewangu ta umunde-unde Komiu? Sela

¹² Polioke pompehohawa-Miu pinalele a laro ngkekeno kaburu, ka pokongkomi-Miu anu nahi bali a mpo'ianga matea?

¹³ Tino'orike pabawa-Miu a laro wongi-wongia, ka moleo-Miu i wita po'ianga domengkinolupe?

¹⁴ Sine ongkue andio, oo Ue, ndi Omiu kupebooli mepetulungi, ka i tempono mo'oru pekakaiku hawe i aro-Miu.

¹⁵ Tembio, oo Ue, ka Itadi aku, Iwunio rupa-Miu inso ndi ongkue?

¹⁶ Mompu'u tempo kumongura i'alu aku urasa'o ka matea, kutembio mongkokongiria hangano Omiu, tetadi rosoku.

¹⁷ Tensilano tekuda-Miu umalu aku, mongkokongirino pabawa-Miu pirego aku,

¹⁸ lumimbu aku kana moowo hawe sumoo oleo, kumadu aku inso a luwuno siuno.

¹⁹ Sambe'e ka wali-wali Ipoko'olai iramo inso ndi ongkue, butu koa wongi-wongi tepoto'oriku.