Po'unde-unde 86 - Wunta Mempori

Pekakai mo'ema pompehohawa nahi bali 86:1-17

¹ Pekakaino i Daudi. Ita'oomo biri-Miu, oo Ue, Isangki akumo, hangano marasai ka mongkokolaro aku.

² Dagaiomo tuwuku, hangano metenunu aku, Ikaduduiomo tetenaa-Miu anu mompe'ala-ala ndi Omiu.

³ Omiumo Ue Alaku, Ipehohawa akumo, oo Ue, hangano ndi Omiumo kupebooli hawe sumoo oleo.

⁴ Ipokomawongkoomo aroano tetenaa-Miu, hangano ndi Omiumo, oo Ue, kutandeo aroaku.

⁵ Hangano Omiu, oo Ue, moiko ka behe mo'ampuni ka hadio ntu'u pompehohawa nahi bali a luwuno mia anu mebooli ndi Omiu.

⁶ Ita'oomo biri a mpekakaiku, oo Ue, ka Iperioomo pau po'emaku.

⁷ A oleo pompema'isoku mebooli aku ndi Omiu, hangano Isangki aku.

⁸ Nahina kana Omiu i olono luwuno pinesombai, oo Ue, ka nahina kana hapa anu wineweu-Miu.

⁹ Luwuno tongku anu pinokogagi-Miu ira mehawe mpengolontu mpesomba i aro-Miu, oo Ue, ka ira mpelangkaio nee-Miu.

¹⁰ Hangano langkai Komiu ka weweu ira anu mengkinohali-haliako, butu koa Omiu Ue Ala.

¹¹ Itisoakunemo pesalaa-Miu, oo Ue, ka kutuwu montonda mentee-Miu; Ipokobobotoliomo aroaku dumoitoakono nee-Miu.

¹² Aku umunde-unde Komiu, oo Ue, Ue Alaku, tompaano aroaku, ka melangkaio nee-Miu ranta nahina tampulaano;

¹³ hangano langkai ntu'u pompehohawa-Miu nahi bali ndi ongkue, ka ipotolaomo penaaku inso a laro ntolinodo mia mate.

¹⁴ Oo Ue Ala, mia mpompelangka-langkai mpentade iramo mensapoi aku, ka gerombolano mia mpompelangka-langkai mpomporaakono penaaku, nahi domperio Komiu.

¹⁵ Sine Omiu, oo Ue, Ue Ala me'aroa ka mompehohawa, tedoa sabara ka hadio ntu'u pompehohawa ka pokongkomi.

¹⁶ Ipewolilimo ndi ongkue ka Ipehohawa akumo, Ipoweeakonomo roso-Miu a ntetenaa-Miu, ka Ikaduduiomo anano tetenaa-Miu beine!

¹⁷ Iweweuomo ndi ongkue asa petondoni moikoa, ka domengkitao mia anu umo'aliaakune ka gagi memokoko'ii, hangano Omiu, oo Ue, Itulungi akumo ka tumarero aku.