Po'unde-unde 85 - Wunta Mempori

Pekakai mo'ema sintuwuno Isaraeli 85:1-14

¹ Tiano petewawado anu mpenani. Penani po'unde-undedo inuleno i Kora.

² Ipemoikoomo wita-Miu, oo Ue, teweweuno i Yako Ipokomoikoomo.

³ Itandeomo salado bawaa-Miu, nami pototo'iako ira luwuno halado. Sela

⁴ Ipokontenonoomo luwuno mosa'ono aroa-Miu, mokotemontoomo tekuda-Miu anu tensila.

⁵ Ipokotompa kamimo, oo Ue Ala puu pongkaduduimami, ka Itadiomo mahakino aroa-Miu ndi omami.

⁶ Ranta nahina tampulaanoke Itekudaakami ka motilaloakono tekuda-Miu mapa'api-api inule?

⁷ Nde nahi behe kami mentuwu, ranta bawaa-Miu memawongko hangano Omiu?

⁸ Ipopokitaakamimo pompehohawa-Miu anu nahi bali, oo Ue, ka Itulungi kamimo!

⁹ Aku rumongeo hapa anu Ira pauo Ue Ala, mentee ntu'u, Ondae i Ue Ira mepau mongkona manangai a bawaa-Do ka a luwuno mia anu pinehohawa-Do, ka si dompepokule a benge-bengea.

¹⁰ Mentee ntu'u, pontulungi-Do umpeda a luwuno mia anu doitoako Ira, onaemo ka ipo'ia maramba-Do i witato.

¹¹ Pompehohawa ka petenunu ira tepohawe, moleoa ka rodoa ira mewoo-woo.

¹² Petenunu ta tuwu inso i tolino, ka moleoa ta melungaako inso i langi.

¹³ Tendeano Ondae i Ue Ira mompowee moikoa, ka witato ta mompowee hasilino.

¹⁴ Moleoa ta melempa i aro-Do, ka Dopelandaakono karu-Do a nsala atuu.