Po'unde-unde 83 - Wunta Mempori

Pekakai mo'ema hukudo iwali anu mpedandi ntepo'asa mpoweweu mosa'o 83:1-19

¹ Penani po'unde-undeno i Asapi: aasa penani.

² Oo Ue Ala, si komino, si penoro-noro ka Ipelelumo, oo Ue Ala!

³ Hangano menteeano luwuno iwali-Miu mpohohoi, luwuno mia anu umo'aliaa-Komiu mpompelangka-langkai.

⁴ Ondae mpoweweu tepo'asaa mpau pe'akala umewai ira bawaa-Miu, ka ondae nteriso ira me'ewaio luwuno mia anu kinadudui-Miu.

⁵ Dompotae, ”Aiwamo tompokotampula ira gagi tongku, ranta neeno Isaraeli nami rinambe mbo'u!”

⁶ Mentee ntu'u, nteriso iramo ka mpe'asa mpau, mpowutu iramo pedandia umewai Komiu:

⁷ anu mpo'ia a luwuno kemano i Edomi ka to Sumaila, Moabi ka to Hagari,

⁸ Gebali ka Amoni ka Amale, Pelisitea saru palilino Tirusi,

⁹ Asuri mbo'u mpe'asa iramo saru ondae, gagi tetenaado inuleno i Lo'oti. Sela

¹⁰ Weweu iramo kana Midia, kana Sisera, kana Yabini umpeda a ngkoro Kisoni,

¹¹ anu merinopu iramo i Eni-Dore, gagi pompokomewalo wita.

¹² Weweu iramo pinemota'udo kana i Orebi ka i Se'ebi, luwuno petewawado kana i Sebahi ka i Salemuna,

¹³ anu mpotae, ”Aiwamo tompentorokio pada pompakambia-Do Ue Ala!”

¹⁴ Oo Ue Alaku, weweu iramo kana ota anu tepanee, kana seami anu pinuurino angi!

¹⁵ Kana api anu sumongkoo tobu, ka kana langano api anu mokomo'ai ira torukuno,

¹⁶ luluako iramo angi mokora-Miu, ka pokotededengkeako iramo lompiu-Miu;

¹⁷ rupado Itutuwiakonomo mokoburua, ka dome'ungkeo nee-Miu, oo Ue!

¹⁸ Po'ineeomo domempinokoko'ii ka ntededengke nahina tampulaano; po'ineeomo dompohawe pontetewehi ka memate,

¹⁹ ka domento'orio nine butu Omiu, i Uemo nee-Miu, Anu Tedoa Mantande i asa wawontolino.