Po'unde-unde 81 - Wunta Mempori

Po'oluako maroa tumondao pesalaa-Do i Ue 81:1-17

¹ Tiano petewawado anu mpenani. Montonda nanino Gititi. Inso ndi Asapi.

² Kokora-koramo mawongkoako Ira Ue Ala, rosoto, kokora-koramo mawongkoako Ira Ue Alano i Yako.

³ Wuatakonomo penani, po'uniomo rebana, katapi anu molino unino, tinondaako gambusu.

⁴ Puuriomo tawuwua a wula wo'ohu, a wula ntii, a oleo langkaito.

⁵ Hangano mongkona atuu aasa pompakosi tiado to Isaraeli, aasa atora inso ndi Ondae Ue Alano i Yako.

⁶ Gagi asa parenta tiano i Yusupu Dopakosio mongkona atuu, i tempono Dolako umewaio wita Masiri. Kurongeo pau anu nahi kuto'orio,

⁷ ”Kutandeomo tinembi inso a oweamu, kaeno tolaomo inso a ngkarandi tinembi;

⁸ a laro ma'isoa omue mebooli, ka Kupotolako; Kusangkiko inso a mpewunia a laro nseru rundu, Ku'arahakomumo umpeda uwoi Meriba. Sela

⁹ Rongeomo hei bawaa-Ku, Aku moweeakomiu pepopoto'ori; hei Isaraeli, tewala beheko rumonge Aku:

¹⁰ ’Si hina i olomu pinesombai susua, ka si pesomba a mpinesombai susua.

¹¹ Ongkuemo Ue, Ue Alamu, anu tumaateko meluarako inso i wita Masiri; pengangamo telangkai, ka Aku mokobukeo.’

¹² Sine bawaa-Ku nahi domerongeo pepau-Ku, ka i Isaraeli nahi behe ndi Ongkue.

¹³ Onaemo pu'uno, Kupo'ineeo a laro moteano aroano; po'ineeomo domentondao po'eheno aroado ondaedo!

¹⁴ Tewala domeronge Aku bawaa-Ku! Tewala domentondao to Isaraeli pesalaa-Ku,

¹⁵ i tempo koa mbo'u atuu iwalido Kupokompetuundu ira, ka i wawono luwuno iwalido Kupotiio kae-Ku;

¹⁶ luwuno mia anu umo'aliaako Ira i Ue ira mpetuundu ndi Ondae, onaemo anu Dotantuiako ira i Ue ranta nahina tampulaano;

¹⁷ sekono bawaa-Ku Aku pakaako ira gandu anu lalu moiko ka Aku mokomowohiako ira siu hoani inso a ntorukuno watu.”