Po'unde-unde 80 - Wunta Mempori

Pekakai tekaduduiado to Isaraeli, keu anggoro-Do Ue Ala 80:1-20

¹ Tiano petewawa mpenani. Montonda nanino Sisi bonse. Pesakosiino i sapi. Penani po'unde-unde.

² Hei puu mpopakambido to Isaraeli, ta'oomo biri, Omiu anu sumaario i Yusupu kana bawaano bimba! Oo Omiu, anu mentoro a wawo luwuno kerubi, Ipe'umbaakomo temewanta

³ i arono i Eparai, i Benami, ka i Manase! Ipopokitaomo roso-Miu ka I'aiwamo kumadudui kami.

⁴ Oo Ue Ala, Ipokotompa kamimo, weweuomo rupa-Miu mewanta, ka kami ntekadudui.

⁵ Ueno luwuakoano, opiapo mbo'u tehineno itensila tekuda-Miu maupo dompekakai bawaa-Miu?

⁶ Ipoweeako ira mpongkaa roti itino uwoi mata, Ipoweeako ira mpo'inu uwoi mata hadio ntu'u,

⁷ Iweweu kami gagi teposisalaado pehori-hori rahamami, ka luwuno iwalimami mempasinggiri kami.

⁸ Oo Ue Ala Anu Tedoa Pabawa, Ipokotompa kamimo, weweuomo rupa-Miu mewanta, ka kami ntekadudui.

⁹ Ilimbaomo keu anggoro inso i Masiri, Isaari iramo tongku, ka i'amba pahoo keu atuu.

¹⁰ Wita atuu Ipatindaakono, onaemo ka imehaka ondalo ntu'u ka buketio wita;

¹¹ luwuno torukuno te'engoiako po'engoino, ka keu arasi melolangkai hangano luwuno sampano;

¹² iweroo luwuno sampa kodeino hawe a ntahi, ka luwuno untuno hawe a ngkoro Eparata.

¹³ Tembio ka Ipobangkuo rere watuno, ranta ka i'opuo sompo mia anu telalo?

¹⁴ Bonti mengkarasikio ka kondehora a mpada mengkaano.

¹⁵ Oo Ue Alano luwuakoano, Ipepokulemo, Ipensiromo inso i langi, ka Ikitaomo! Ipekokoongakono keu anggoro andio,

¹⁶ Idagaiomo hapa anu pinahono kae ngkoana-Miu, tumba anu Ipokorosoomo tia-Miu!

¹⁷ Domentunuomo a laro api kana kuli mpae; po'ineeomo dontetadi tampulaako te'iseno rupa-Miu!

¹⁸ Po'ineeomo kae-Miu kumongkomio mia anu i koana-Miu, anano mia anu Ipokogagiomo wela mehasili ndi Omiu,

¹⁹ ka omami nahi kami mepansia inso ndi Omiu. Ipotuwu kami, ka kami mpebooliakono nee-Miu.

²⁰ Oo Ue, Ue Alano luwuakoano, Ipokotompa kamimo, Ipokomewantaomo rupa-Miu, ka kami ntekadudui.