Po'unde-unde 8 - Wunta Mempori

Mia mokoko'undu gagi tuwu maramba 8:1-10

¹ Tiano petewawado anu mpenani. Montonda unino penani Gititi. Penani po'unde-undeno i Daudi.

² Oo Ue, Uemami, tedoa maramba nee-Miu i asa wawontolino! Langkaino pabawa-Miu anu lumaloio langi pinenaniako.

³ Inso a ngangado nana'ote kodei ka nana'ote anu mo'uo Iwanguomo roso a mia anu umewai Komiu, mokompenaa-naao iwali ka anu monaa-naa aroa.

⁴ Tewala kukitao langi-Miu, wineweuno wunga ngkae-Miu, wula ka luwuno anano wula anu ninaa-Miu:

⁵ hapake mia, ranta ka Irambeo? Hapake anano mia, ranta ka Iperioo?

⁶ Sine Iweweuomo mingki mengkena kana Omiu Ue Ala, ka Iramba-rambaakonomo marambaa ka pompelangkai.

⁷ Omiu weweuo ka ipabawa a luwuno wineweuno kae-Miu; luwuakoano Inaaomo a ntoto ngkaruno:

⁸ bawaano bembe bimba ka luwuno sapi, saru mbo'u luwuno kondehora mo'ila a mpada;

⁹ luwuno manu-manu i laro meene ka luwuno bou a ntahi, ka hapamo koa anu telaloio mansolono tahi malua.

¹⁰ Oo Ue, Uemami, maramba ntu'u nee-Miu i asa wawontolino!