Po'unde-unde 79 - Wunta Mempori

Po'emaa ampu ka pombaloa 79:1-13

¹ Penani po'unde-undeno i Asapi. Oo Ue Ala, luwuno tongku susua domensapoi iramo mia-Miu, mengkokoburutio raha mempori-Miu, meweweuo Yerusale gagi howuno anu terawo.

² Dompeweengakono wata ngkoroido tetenaa-Miu gagi kaangado manu-manu i laro meene, baudo mia anu pinehohawa-Miu a luwuno kondehora mo'ila i tolino.

³ Reado inuwu kana uwoi lumimbuo Yerusale, ka nahina anu mongkaburu.

⁴ Omami gagi tataado pehori rahamami, gagi popodeu-deu ka pasinggiriado mia lumimbu kami.

⁵ Opiapo mbo'u tehineno' oo Ue, Itekuda mpiha, ka mosa'ono aroa-Miu kolanga-langa kana api?

⁶ I'uwuomo tekuda-Miu a wawo luwuno tongku anu nahi to'ori Komiu, a wawo luwuno poparentaa anu nahi pebooliakono nee-Miu;

⁷ hangano pingkoomo domengkaano i Yako, ka mperawo-rowoo po'iangano.

⁸ Siimo Ipototoiakami salado uempu'umami, sine bakanaano pompehohawa-Miu ronga tumotowo kami, hangano tedoa kamimo memolema.

⁹ Itulungi kamimo, oo Ue Ala puu pongkaduduimami, pokomarambano nee-Miu! Ipotola kamimo ka I'oniniomo halamami hangano nee-Miu!

¹⁰ Tembio luwuno tongku susua pino'inee mpotae, ”Isua Ira Ue Alado?” Po'ineeomo pombaloa a reado tetenaa-Miu anu te'uwu pinokomengkaa i arono matamami i olodo tongku susua.

¹¹ Po'ineeomo ka ihawe i aro-Miu pompemasusano mia tinorungku; menunu saru langkaino tokia-Miu, po'ineeomo domentuwu mia anu ira mehinuku mate!

¹² Pokuleomo meluka opitu a wawo mpa'ado tongku pehori-hori, pompepaukiako anu dompetadiakono ndi Omiu, oo Ue!

¹³ Ka omami andio, bawaa-Miu, ka bawaano bimba pinakambi-Miu, kami me'unde-unde Komiu ranta nahina tampulaano, ka kami mempaleleo po'unde-unde tia-Miu mapa'api-api inule.