Po'unde-unde 78 - Wunta Mempori

Ondae Ue Ala mompehohawa ka bawaa anu mpe'ewa 78:1-72

¹ Penani pompaguruno i Asapi. Ta'oomo birimiu ka imerongeo pompaguruku, hei tongkuku, lingkeomo birimiu a mpinauno ngangaku.

² Aku menganga mohaweo powadi, aku tumutuluo singguru inso a tempo se'eluno.

³ Anu kimerongeomo ka kimento'orio, anu domentutuluakami uempu'umami,

⁴ nahi kami mewuniako ira anado, sine kami mentutuluo a inule anu lembui, luwuno wineweu-Do i Ue anu telele ka roso-Do ka luwuno wineweu-Do anu kinohali-haliako anu Doweweuomo.

⁵ Pompakosi Doluarakono ndi Yako ka Taura-Do Dopeweengakono a tongku Isaraeli; uempu'uto Doparenta ira ka dopopoto'oriako ira anado,

⁶ ka domento'orio inule anu lembui, kai luwuno nana'ote, anu ira mehina te'ipua, mpewangu ka mentutuluako ira anado,

⁷ ka domenaao pompe'ala-ala ndi Ondae Ue Ala ka nahi domengkolupeo luwuno wineweu-Do Ue Ala, sine me'inio luwuno parenta-Do;

⁸ ka si kana uempu'udo, inule anu humapu Ira i Ue ka me'ewa, inule anu nahi rodo aroado ka nahi moroso dompe'ini ndi Ondae Ue Ala.

⁹ Inuleno i Eparai, luwuno puu pompana anu sompo parewa mpeteado, mpepokule a oleo peteaa;

¹⁰ nahi dompe'ini a mpedandia-Do Ue Ala ka nahi dobehe mentuwu montonda Songka-Do.

¹¹ Domengkolupeo luwuno inangga ka wineweu-Do anu kinohali-haliako, anu Dopopokitaomo ndi ondae.

¹² I arono uempu'udo Doweweu ira anu mengkinohali-haliako, i wita Masiri, i pada Soani;

¹³ Doponsuao tahi, Dosakiako ira; Doweweuo uwoi mentade kana binunto,

¹⁴ Dotaateako ira seru i tempono meene, ka asa wongi mpobutu saru mewineno api;

¹⁵ Dobansio torukuno watu i pada one, Dopopo'inu ira ranta te'osaado kana inso a luwuno ondaloano tahi;

¹⁶ Doweweuo waaano uwoi meluarako inso a pongku watu, ka waa metii kana korono.

¹⁷ Sine mpoweweu ira mpiha hala ndi Ondae, onaemo umewai Ira Anu Tedoa Mantande ipada one.

¹⁸ I laro aroado umara-arahako Ira Ue Ala onaemo mpo'ema kaanga tumondao po'eheno aroado.

¹⁹ Ondae mpepau umewai Ira Ue Ala, ”Poli Irake Ue Ala mompatinda meda pongkaanga i pada one?

²⁰ Lano, Dotunduhio torukuno watu, ranta tepana uwoi ka waaomo luwuno korono; sine Dopolioke mompowee mbo'u roti, ke mompatindaako ira bau bawaa-Do?”

²¹ Onaemo pu'uno, tempono rumongeo mongkona atuu, Ondae i Ue bamburu, ka i'amba kolanga-langaomo api umaluo i Yako, ka tekuda-Do tesingka umaluo Isaraeli,

²² hangano nahi dompe'ala-ala Ira Ue Ala, ka nahi dompomperorohi pontulungi-Do.

²³ Ondae mbo'u parenta ira seru inso iwawono, umungkahi ira pewowano langi,

²⁴ motiiako ira usa mana ka ikinaa, ka moweeako ira gandu inso i langi;

²⁵ sompo mia mongkaaomo rotido mala'eka, ndi ondae hadio ntu'u.

²⁶ Dopuuriomo angi sabaano oleo i langi ka wawaakono roso-Do angi selata;

²⁷ Dopotiiako ira usa bau kana pampawu hadiono, ka usa manu-manu mepani kana one i tahi;

²⁸ Dodontaio i tongano pekemaado, lumimbuo po'ianga atuu.

²⁹ Ondae mpongkaa ka gagi tedoa mowohi; Do'ihiiako ira po'ehedo.

³⁰ Sine kontongaano napi tende po'ehedo, tekonai kaanga da kongko a ngangado,

³¹ tesingkaomo tekuda-Do Ue Ala ndi ondae: Dopepate ira miado anu moroso, ka mepate ira ana ntama kontuwuado to Isaraeli.

³² Maupo kanatuu da mpoweweu ira koa hala ka nahi pine'ala-ala luwuno wineweu-Do anu kinohali-haliako.

³³ Onaemo pu'uno, Doweweuo luwuno oleodo tampula kana ahu ka luwuno ta'udo nahi kinoo-koo.

³⁴ Tewala Dopepate ira, onaemo ka dome'ungke Ira, ondae mpepokule ka merorohi Ira Ue Ala;

³⁵ domerambeo nine Ondae Ue Ala onaemo torukuno watudo, ka nine Ondae Ue Ala Anu Tedoa Mantande onaemo Puu Pontolosido.

³⁶ Sine dopopo'ooako Ira ngangado, ka saru elodo mpegaupi ira ndi Ondae.

³⁷ Aroado nahi petako ndi Ondae, ka nahi dompetenunu a mpedandia-Do.

³⁸ Sine, Ondae mompehohawa, Do'ampunio salado ka nahi Doropu ira; mararu Dopeteao tekuda-Do ka nahi pokotesingkao luwuno mosa'ono aroa-Do.

³⁹ Dorambeo nine ondae atuu butu koa bau, angi anu telalo, anu nahi ta mekule.

⁴⁰ Ba pempia dompe'ewa ndi Ondae i pada one, ka mokomasusao aroa-Do a mpada malua!

⁴¹ Mararu dome'ara-arahako Ira Ue Ala, mokomahakio aroa-Do Anu Tedoa Mempori, Ue Alado to Isaraeli.

⁴² Nahi domerambeo pabawa-Do, a oleo Dopotola ira inso a luwuno iwali,

⁴³ tempono Dopokohina ira petondoni i Masiri ka luwuno anu kinohali-haliako i Soani;

⁴⁴ tempono Dobali ira luwuno korono gagi rea ranta luwuno waaano uwoido gagi nahi pinoko'inu;

⁴⁵ tempono Dopompotolaako ira lale uso anu kumaa ira, ka hadio tumpa anu rumopu ira;

⁴⁶ tempono hasilino witado Doweeakono ule-ule, ka hasilino pe'iseido a ngkosume;

⁴⁷ tempono keu anggorodo Dopepateakono usa watu, ka saru tontoru baku a luwuno keu arado;

⁴⁸ tempono Dopo'ineeo bawaano kondehorado i'alu ira usa seru baku, ka pinotuwudo itiuo koliki;

⁴⁹ tempono Dopotiio tekuda-Do anu tensila, mosa'ono aroa, bamburu ka pompema'iso: asa bawaa mala'eka powawa masolaa;

⁵⁰ tempono Doluarakono tekuda-Do, ka nahi domempino'inee tola inso a matea, penaado Dopeweengakono a haki lele;

⁵¹ tempono Dopepate ira luwu ana aka i Masiri, wua amba-ambano roso a luwuno kemano i Hami;

⁵² tempono Dowawa ira bawaa-Do kana luwuno bimba, ka wawa ira kana bawaano pinotuwu i pada one;

⁵³ ondae merodo tempono Dotaate ira, ranta nahi domedoito, kontongaano iwalido itutuwi ira tahi;

⁵⁴ tempo Dowawa ira a mpo'ianga-Do anu mempori, a ntorukuno andio, anu pinongko'alano kae ngkoana-Do;

⁵⁵ tempono Dosaari ira tongku inso i arodo, tumia-tiaako ira wita pusaka mompake koloro posongka, ka tumena ira suku Isaraeli mpo'iangario luwuno kemado atuu.

⁵⁶ Sine ondae mpo'ara-arahako ka me'ewa ndi Ondae Ue Ala, Anu Tedoa Mantande, ka nahi dompe'ini a luwuno pepopoto'ori-Do;

⁵⁷ domebintao pompe'ala-alado ka mehapuo pedandia kana uempu'udo, mpepokule kana pana anu mepokule lakoano;

⁵⁸ aroa-Do dompokomahakiakono luwuno po'ianga pompelangkaia, weweu Ira mahaki aroaako luwuno tinahado.

⁵⁹ Tempono Dorongeo Ue Ala, gagi Ira bamburu, nahi Dotarima ira ntu'u to Isaraeli;

⁶⁰ Dotadio po'ianga-Do i Silo kema anu pino'iangari-Do i olono mia;

⁶¹ Dopo'ineeo roso-Do tinawa, maramba-Do tedonta a ngkaeno iwali;

⁶² Dopo'inee ira bawaa-Do ikaano ponai, ka bamburu Iramo a mia-Do.

⁶³ Luwuno ana ntama kontuwuado memo'ai, ka luwuno ana beine kontuwuado nami dome'inunde-undeako penani petaoa;

⁶⁴ luwuno sando mpesombado memateako ponai, ka luwuno tuwu beinedo nahi dontengko'ala mposabangi.

⁶⁵ Ka i'amba tewangu Iramo i Ue, kana mia anu tekoturi, kana pongkiari anu umari molanguako anggoro;

⁶⁶ Donangi ira luwu iwali-Do, Doweweu ira ntekoko'ii ranta nahina tampulaano.

⁶⁷ Nahi Dotarimao kemano i Yusupu, ka nahi Dobinikio mbo'u suku Eparai,

⁶⁸ sine Dobinikio suku Yehuda, Torukuno Sioni anu pinehohawa-Do;

⁶⁹ Dowanguo po'ianga mempori-Do kana langi anu mantande, kana tolino anu pinontoro-Do ranta nahina tampulaano.

⁷⁰ Dobinikio i Daudi, tetenaa-Do, Do'alao inso i olodo walano bawaa bembe bimba;

⁷¹ inso a mpo'iangado bimba anu mpompo'uo Dowawao ka ipakambio i Yako, bawaa-Do, ka Isaraeli mia-Do.

⁷² Ipakambi ira a bobotolino aroano, ka tumaate ira a ponto'orino kaeno.