Po'unde-unde 77 - Wunta Mempori

Pompenooti: nde bali Iramoke Ue Ala 77:1-21

¹ Tiano petewawado anu mpenani. Montonda i Yedutuni. Penani po'unde-undeno i Asapi.

² Aku meboo-booli temeroku ndi Ondae Ue Ala, temeroku ndi Ondae Ue Ala, ka Doperorongeakune.

³ A oleo masusaaku ku'ungke Ira i Ue; i tempono wongi kaeku tewero ka nahi gagi telusa, aroaku nahi behe tinarero.

⁴ Tewala kurambe Ira Ue Ala, meraepi akumo, tewala mo'ia aku mompewowolo, komole-molemanomo rosoku. Sela

⁵ Kuli mataku Iweweuo nahi tempiro; danggara aku, ranta nahi kupokompepau.

⁶ Kupewowoloo luwuno oleo tempo anu telalo ka luwuno ta'u tempo se'eluno.

⁷ Kurambeo pemaeno katapiku i tempono wongi, ka penaaku mepo'ungke,

⁸ ”Ranta nahina tampulaanoke Ondae i Ue nahi Dopontarima ka mbo'u nahi Dopemoikoo?

⁹ Tampulaomo mpihake petenunu pompehohawa-Do, tampulaomoke dandi atuu ipinolempa mapa'api-api inule?

¹⁰ Tekolupe Iramoke Ue Ala mompehohawa, ke Dobuntoo pompowee-Do hangano tekuda-Do?”

¹¹ Onaemo ka kupotae, ”Onaemo andio anu dumuhuo ateku, nine kae ngkoana-Do Anu Tedoa Mantande baali.”

¹² Aku rumambeo luwuno wineweu-Do i Ue, oo, aku rumambeo luwuno wineweu-Miu anu kinohali-haliako inso a tempo se'eluno.

¹³ Aku mepaguruakono luwuno inangga-Miu, ka mo'ia mewowoloo luwuno wineweu-Miu.

¹⁴ Oo Ue Ala, pesalaa-Miu onaemo mempori! Ue Ala isuake anu tedoa langkai kana Ue Alamami?

¹⁵ Omiumo Ue Ala anu moweweu kinohali-haliako; Ipokomengkaaomo pabawa-Miu i olodo luwuno tongku.

¹⁶ Saru tokia-Miu Itolosi iramo bawaa-Miu, inuleno i Yako ka inuleno i Yusupu. Sela

¹⁷ Ikita Komiumo uwoi, oo Ue Ala, ikita Komiumo uwoi, ka i'amba gagi doito, maupo luwuno tahi ondalo mbo'u mpondidi-ndidi.

¹⁸ Luwuno seru mpo'uwu uwoi, luwuno seru me'u'uru, tendeano ana mpana-Miu mpene-nee.

¹⁹ Memuuno rundu-Miu mebanumbu, koliki wantahio tolino, tolino mondidi-ndidi ka leelu.

²⁰ Pesalaa-Miu molalo tahi ka batatana-Miu molalo wawo uwoi anu malua, sine hanga-Miu nahi tengkita.

²¹ Itaate iramo bawaa-Miu kana bawaano bimba molalo i Musa ka i Haruni.