Po'unde-unde 74 - Wunta Mempori

Ponsabangi hangano Raha Mempori anu tehoa 74:1-23

¹ Penani pompaguruno i Asapi. Tembio, oo Ue Ala, ka Itadi kamimo mpiha? Tembio ka itensila tekuda-Miu a bawaano bembe bimba pinakambi-Miu?

² Irambe iramo bawaa-Miu anu hinawe-Miu a tempo se'eluno anu tinolosi-Miu gagi tongku pine'ue-Miu! Irambeomo Torukuno Sioni anu pino'iangari-Miu.

³ Temararumo I'aiwa a nterawoano anu tehineomo tepo'ia andio; luwuakoano dompokotampulaomo iwali a mpo'ianga mempori.

⁴ Luwuno iwali-Miu mpebooliki a ntepotowoa-Miu ka dompontade iramo banderado gagi petondoni.

⁵ Tengkita kana mia mo'io uase a laro ngkeu anu mokapa,

⁶ ka luwuno nggorino domempaluakono uase ka bingku.

⁷ Domesongkoo po'ianga mempori-Miu, domengkokoburutio po'ianga-Miu hawe merete saru wita.

⁸ Dompotae i laro aroado, ”Moikoomo tomempokonsii ira luwu!” Luwuno po'ianga tepotowoa-Do Ue Ala i wita andio domesongkoo.

⁹ Luwuno petondoni ndi omami nahi kimengkitao, nami hina mbo'u nabi, ka nahina i olomami anu tumo'orio hawe te'opia tempono.

¹⁰ Opiapo mbo'u tempono, oo Ue Ala, dompontata iwali, ka iwali mpepaukiakono mpiha nee-Miu?

¹¹ Tembio ka Iwali padiio kae-Miu, numaao kae ngkoana-Miu a rada?

¹² Sine Omiu, oo Ue Ala onaemo mokoleku inso tempo se'eluno, Omiu mongkadudui i tolino.

¹³ Roso-Miumo anu monsiao tahi, ka pehao uludo ule naga a wawo uwoi.

¹⁴ Omiumo anu pirego ira uludo Lewiata, ka meweengakono gagi kaangado anu mpo'ia a mpada malua.

¹⁵ Omiumo anu umungkahio mata uwoi ka korono; Omiumo anu mokomo'are ira korono anu biasano waa mpiha.

¹⁶ Omiumo me'ueo meene, Omiu koa mbo'u me'ueo wongi. Omiumo anu monaa pompokomewanta ka mata'oleo.

¹⁷ Omiumo anu pakosio luwuno tidano tolino, tempo motu'i-tu'i ka wula usa Omiumo anu weweuo.

¹⁸ Irambeomo kana'umpe domentatao iwali nee-Miu, oo Ue, ka tongku anu monge-monge atuu mpepaukiakono.

¹⁹ Si peweengakono penaano marapati-Miu a ngkondehora mo'ila! Si kolupeo mpiha penaado mia-Miu anu tepokonsii!

²⁰ Ipengkitamo a mpedandia, hangano luwuno po'ianga wongi-wongi i wita andio gagiomo po'iangano pobobarasaia.

²¹ Si po'ineeo mia anu linolanda mekule saru mokoko'ii. Po'ineeomo mia tebobarasai ka mia mongkokolaro umunde-undeo nee-Miu.

²² Ipentademo, oo Ue Ala, I'alaakonomo kara-kara-Miu! Irambeomo kana'umpe mia monge-monge tumata Komiu hawe sumoo oleo.

²³ Si kolupeo suarano iwali-Miu, rurundudo anu me'ewa, anu kogagi-gagino memuu.