Po'unde-unde 73 - Wunta Mempori

TIANO III: 73–89 Pompemasusano mia anu moleo aroa

¹ Penani po'unde-undeno i Asapi. Menteeano Ondae Ue Ala atuu moiko a mia anu moleo aroano, ndi ondae anu morina aroado.

² Sine ongkue, tedeimo koa itelendo karuku, ilawu kutelendo.

³ Hangano mosa'o aroaku ndi ondae anu melaba mpau, tewala kukitao manangaido mia mosa'o gaudo.

⁴ Hangano pompemahaki anu mowawa matea nahina ndi ondae, ka koroido mewalo;

⁵ nahi dompembasaio masusano mia, ka nahi kona ira pohuku kana mia susua.

⁶ Onaemo pu'uno, ka dompe'enu-enuako pompelangka-langkai ka mpesangkaako pobobarasai.

⁷ Hangano mewalo, matado memungku, aroado luluaako pontuluri.

⁸ Ondae mpebiu ka mpopau anu memosa'o, ondae pompau porontua saru mpompelangka-langkai.

⁹ Ondae mpenganga umewaio langi, ka elodo melaba mpau i tolino.

¹⁰ Onaemo pu'uno mia mpepokule ndi ondae, kana uwoi anu hadio ntu'u humawe ira.

¹¹ Dompotae, ”Kana'umpe ka Doto'orio Ue Ala mongkona atuu, hinaoke ponto'ori ndi Ondae Anu Tedoa Mantande?”

¹² Menteeano, kanatuumo mia mosa'o gaudo: domentuwu nahina tinembi ka mpohowu mpiha arataa kaeaa.

¹³ Nahina ntu'u tuduno kukorahakono aroa anu morina, ka wo'ohio kaeku, tondonino nahina salaku.

¹⁴ Sine ikona aku pohuku hawe sumoo oleo, ka kona huku sompo mo'oru.

¹⁵ Ande-andeno kupompewowolo, ”Ineheku mepau kanatuu,” ka manasa kuhapuomo inuledo anamiu.

¹⁶ Kanatuumo kupo'ia mompewowolo ka kupokonto'orio, sine mongkona atuu butu gagi pokomasusaku,

¹⁷ hawe ka kupewinso a laro po'ianga mempori-Do Ue Ala, ka kupoposooo umariado.

¹⁸ Menteeano a luwuno moloreano Inaa ira, Iwinso ira a laro masolaa.

¹⁹ Ha, sarai ntu'u ka dontedonta, tetadi moliu iteleo mongkokongirino matea!

²⁰ Kana mo'ipi i tempono mewangu, oo Ue, tempono Ipentade, rupado Ipekodeio.

²¹ Tempono masusa aroaku ka wua horiku kana dinuhu-duhu,

²² benge-benge aku ka nahi kuponto'ori, kana aku pinotuwu umpeda ndi Omiu.

²³ Sine umpeda aku mpiha ndi Omiu; Omiu uminio kae ngkoanaku.

²⁴ Itaateakune patudu-Miu, ranta poko'ariano Itande aku a laro marambaa.

²⁵ Isema mbo'u anu aku me'ueo i suruga, tewala i tolino nahina anu kinekewoiku sangkadio Omiu?

²⁶ Koroiku lano ta mate ka rosoku ta pingko, sine torukuno watuku ka tiaku Ondae koa mpiha Ue Ala nahina tampulaano.

²⁷ Hangano menteeano, isema anu olai inso ndi Omiu ta mate; Ipepate ira luwu mia, anu nahi petenunu mbo'u ndi Omiu.

²⁸ Sine ongkue, ineheku umpeda ndi Ondae Ue Ala; Ondae Ue Ala kupakosio gagi pepekaduduiaku, ka kupokotutuluo luwuno inangga-Do.