Po'unde-unde 71 - Wunta Mempori

Pekakai mo'ema pekadudui i tempo mota'u 71:1-24

¹ Ndi Omiu, oo Ue, kupepekadudui, Osi'i ntu'u kupinokoko'ii.

² Ipotola akumo ka Ipokomalua akumo hangano moleo-Miu, Ita'oomo biri-Miu ndi ongkue ka Ikadudui akumo!

³ Igagimo torukuno watu pongkaduduiku, po'ianga moiko ku'aiwa sompo tempo. Lano medandi Komiumo Komiu kumadudui aku, hangano Omiumo pongku watuku ka pekorahakoaku.

⁴ Oo Ue Alaku, Ipotola akumo inso a ngkaeno mia mosa'o gauno, inso a pokungkudo mia mpoweweu po'ehedo ka melambaha.

⁵ Hangano Omiumo pinerorohiku, oo Ue, pine'ala-alaku mompu'u tempo mongura, oo Ue Ala.

⁶ Ndi Omiu kupehonda mompu'u inso a mpe'anakaa, Iluarako akumo inso a mpe'anakaado ineku; Omiu anu wela inunde-undeku.

⁷ A hadio mia ongkue gagi kana petondoni, hangano Omiumo pepekaduduiaku anu moroso.

⁸ Po'ineeomo ngangaku bukeako po'unde-unde ndi Omiu, saru pompelangkai ndi Omiu hawe sumoo oleo.

⁹ Si tadi aku i tempono kumota'u, si binta aku tewala pingko rosoku.

¹⁰ Hangano luwuno iwaliku mempopau aku, mia anu mpomporaakono penaaku teriso mperonga-ronga

¹¹ ka mpotae, ”Onae dobintaomo Ue Ala, lampuio ka rakoo, hangano nahina anu motolao!”

¹² Oo Ue Ala, si olai inso ndi ongkue! Ue Alaku, Ipontuturakomo tumulungi aku!

¹³ Po'ineeomo dompohawe mokoko'ii ka pingko memate mia anu mpe'iwaliakune; po'ineeomo dompesoumbuako pontata ka mokoko'iia mia anu pompewowolo masolaaku!

¹⁴ Sine ongkue, aku wela mpiha momperorohi ka koteti-tetiangino mowuatako po'unde-unde ndi Omiu;

¹⁵ ngangaku ta tumutuluo moleo-Miu ka tekaduduia inso ndi Omiu hawe sumoo oleo, hangano nahi kupokodoao.

¹⁶ Hawe aku ka mepau mongkona luwuno moroso-Do Ue Ala, paleleo butu moleo-Miu!

¹⁷ Oo Ue Ala, Ipaguru akumo mompu'u tempo kumongura, ka hawe kanandio-andio kupaleleo wineweu-Miu anu kinohali-haliako;

¹⁸ hawe mbo'u tempono kumota'u ka mopute wuuku, oo Ue Ala, si binta aku, ka kupaleleo moroso-Miu a luwuno inule anu ta hawe, moroso

¹⁹ ka moleo-Miu, anu humaweo langi anu mantande, oo Ue Ala. Iweweu iramo mongkona anu langkai, isemake kana Omiu, oo Ue Ala?

²⁰ Maupo Iweweu akumo membasaio hadio masusaa ka masolaa, Komiu koa wali motuwu aku, ka inso a ondaloano ntu'u tolino Komiu koa wali wuatako aku.

²¹ Po'ineeomo ka Ipomuleakune moikono neeku ka wali tumarero aku.

²² Ongkue mbo'u ineheku menaniako-Miu po'unde-unde saru gambusu hangano pompehohawa-Miu nahi otu-otu, oo Ue Alaku, menania-Komiu penani po'unde-unde saru katapi, oo, Omiu Anu Tedoa Mempori, Ue Alado to Isaraeli.

²³ Wiwiku ta kokora-kora mo'unde ka menania-Komiu penani po'unde-unde, sumangaku mbo'u anu Ipotolaomo ta kokora-kora mo'unde.

²⁴ Eloku mbo'u ta popauo moleo-Miu hawe sumoo oleo. Mentee ntu'u ondae anu mpompewowolo masolaaku ira mpohawe mokoko'ii ka pontata.