Po'unde-unde 7 - Wunta Mempori

Ondae Ue Ala, Puu Mpobitara anu moleo 7:1-18

¹ Penani ponsabangino i Daudi, anu pinenaniako tia-Do i Ue hangano i Kusi, to Benami atuu.

² Oo Ue, Ue Alaku, ndi Omiu kupepekadudui; Ikadudui akumo inso a luwuno mia anu lumulu aku ka Ipotola akumo,

³ ka si domengkana singa mperangkami aku ka domeberi-beri aku, nahina anu motola aku.

⁴ Oo Ue, Ue Alaku, tewala ongkue moweweu andio: tewala hinao molengkua a ngkaeku,

⁵ tewala ongkue moweweu anu mosa'o a nsambe'eku, ke momuruo iwaliku nahina pu'uno,

⁶ po'ineeomo ilulu aku iwali ka rumako aku, lumolandao tuwuku a wita, ka numaao pelangkaiku a laro pampawu.

⁷ Ipentademo, Ue, a laro tekuda-Miu, Ipentademo umaropio bamburudo mia anu umewai aku, Ipentadeakunemo, Omiu anu mompowee moleoa!

⁸ Po'ineeomo luwuno tongku mpepumpu lumimbu Komiu, ka Ipentoromo i wawodo a mpo'ianga anu mantande.

⁹ Ondae i Ue bitara ira tongku. Ibitara akumo, Ue, hangano mentee aku, ka bobotoli ntu'u aroaku.

¹⁰ Po'ineeomo ka ipenaa-naa poweweudo anu mosa'o mia mosa'o gaudo, sine Ipokorosoomo mia anu mentee, Omiu anu paresao aroa ka laro aroano mia, oo Ue Ala anu moleo.

¹¹ Ondae Ue Ala onaemo kantaku, puu pongkaduduido mia anu bobotoli aroano;

¹² Ondae Ue Ala onaemo puu mpobitara anu moleo ka Ondae Ue Ala anu tekuda sompo tempo.

¹³ Tewala mia nahi tepidi, Do'ahao ponai-Do, Dodiio pana-Do ka mepana.

¹⁴ A mia atuu, Dopatindao luwuno parewa mpetea anu mompepate, ka weweuo ana mpana-Do melanga.

¹⁵ Menteeano, mia atuu mentiaako mosa'oa, onae mentiaako lambaha ka me'anaako pegaupi.

¹⁶ Onae moweweu aa ka kumekeo, sine onaeno tedonta a laro aa anu wineweuno.

¹⁷ Lambahaa anu wineweuno mepokule umaluo uluno, ka lambahano metii dumunsio taku uluno.

¹⁸ Aku mowuatako po'unde-unde ndi Ondae i Ue hangano moleo-Do, ka menani umunde-undeo nee-Do, Anu Tedoa Mantande.